Ҳиндистон шимолидаги сув тошқинида ҳалок бўлганлар сони 200 кишидан ошди

Ҳиндистон шимолидаги Жамму ва Кашмир штатида жала қуйиши натижаси юзага келган сув тошқини қурбонлари сони 200 кишидан ошиб кетди, дея хабар бермоқда ИТАР-ТАСС Ҳиндистон ички ишлар вазири Ражнатх Сингхга таяниб.

Унинг айтишича, 130 минг киши хавфсиз туманларга эвакуация қилинган. «Ички ишлар вазири ўринбосари доимий равишда сув тошқини ҳудудида бўлиб, вазиятни назорат қилмоқда», — дея қўшимча қилди сиёсатчи.

Аввалроқ штат бош вазири Умар Абдулла ушбу сув тошқинини ярим аср ичидаги энг кучлиси деб атаган эди. Жаммудаги 350 та қишлоқ тўлиқ сувга ғарқ бўлган. Табиий офат ҳудудида жами мингга яқин қишлоқ бор.

Қутқарув операцияларига Ҳиндистон ҳарбий ҳаво кучларининг 23 та самолёти ва 26 та вертолёти жалб этилган. Уларнинг бортида пойтахтдан дори-дармонлар ва энг зарур буюмлар етказилмоқда. Штатга 3 мингта чодир ва 100 мингта кўрпа ҳаво орқали етказиб берилган.

Бош вазир Нарендра Моди ўз навбатида сув тошқинига қарши кураш ва жабрланганларга ёрдам кўрсатиш учун марказий ҳукумат 100 миллион рупий (тахминан 1,6 миллион доллар) ажратишини айтди.

Ҳар йили июлдан сентябргача бўлган даврда Ҳиндистон ҳудудининг катта қисмида ёмғирлар мавсуми бўлиб ўтади, улар сув тошқини ва қияликларнинг ўпирилишини келтириб чиқаради. 2013 йилда Уттаракханд штатидаги тошқинлар 5 мингдан ортиқ кишини ҳаётдан олиб кетди.