Shimoliy Koreya Oliy sudi mamlakatga go‘yoki josuslik maqsadida noqonuniy kelgan 24 yoshli AQSh fuqarosini 6 yil muddatga mehnat lageriga hukm etdi, deya xabar bermoqda “Novaya gazeta” Associated Press’ga tayanib.
Sud majlisi bir yarim soat davom etdi.
Sud bayonotiga ko‘ra, Mettyu Miller shu yilning 10-aprelida Pxenyan pasport nazoratida vizasini yirtib tashlagan va keyinroq KXDRda inson huquqlari bilan bog‘liq vaziyatni maxfiy ravishda o‘rganish uchun mahalliy qamoqxonaga tushmoqchi bo‘lganini tan olgan.
Miller advokat yollash huquqidan bosh tortdi. Hukm chiqarilganidan so‘ng amerikalikni sud zalidan qo‘liga kishan kiydirilgan holda chiqarib ketishdi.
Aprel oyida AQSh fuqarosi Shimoliy Koreyadan boshpana so‘ragani ma’lum bo‘ldi. Biroq ayblovchi tomon buning shunchaki hiyla-nayrang bo‘lganini aytdi. Ular shuningdek, Miller o‘z gadjetlarida AQSh va Janubiy Koreya harbiylari haqida maxfiy ma’lumot borligini aytib mahalliy hukumatni aldaganini ta’kidladi.
O‘tgan haftada Associated Press’ga bergan qisqa intervyusida Miller AQSh prezidenti Barak Obamaga xat yozib, hali javob olmaganini aytgan edi.
Ayni paytda Shimoliy Koreyada hukumat tomonidan qo‘lga olingan uch nafar amerikaliklar saqlanmoqda. Yaqin orada KXDRga sayyoh sifatida tashrif buyurgan Jeffri Foul ishi bo‘yicha sud bo‘lishi kutilmoqda. U may oyida o‘zining mehmonxona nomerida Injil kitobini qoldirib ketganlikda ayblanib hibsga olingan. Uchinchi amerikalik — missioner Kennet Bey “dushmanlarcha xatti-harakatlar” ayblovi bilan 15 yillik qamoq jazosini o‘tamoqda.
Izoh (0)