1955 йил 27 август куни Буюк Британияда Гиннеснинг Рекордлар китоби илк бор нашр қилинган эди. Айни пайтда китоб 100 дан ортиқ мамлакатда 23 тилда ҳар йили босиб чиқарилади. 2005 йилда китобнинг 100 миллионинчи нусхаси сотилган.
59 йиллик умри давомида китобга сиёсат соҳасидаги анчагина рекордлар ҳам киритилган. ИТАР-ТАСС уларнинг энг диққатга сазоворларини келтириб ўтди.
Энг ёш давлат раҳбари — Ким Чен Ин. КХДР етакчиси Ким Чен Ирнинг учинчи ўғли 2011 йил 17 декабрда отаси вафот этгач, «буюк меросхўр» деб эълон қилинди. Ким Чен Иннинг аниқ ёши номаълум: унинг туғилган санаси турлича келтирилади — 1982, 1983 ёки 1984 йил 8 январь.
Амалдаги энг кекса монарх — 90 ёшли Абдулла ибн Абдул Азиз Ал Сауд. Саудия Арабистони қироли 2005 йил 1 август куни 81 ёшида тахтга ўтирган.
Рекорд сондаги давлатлар раҳбари — Буюк Британия қироличаси Елизавета II. У 16 та мамлакатга ҳукмронлик қилади. Елизавета II номигагина қиролича бўлиб, сиёсий ҳукмронликка эга бўлмаса-да, Британия Миллатлар Ҳамдўстлигига тегишли 15 та давлат, Буюк Британия ҳамда Британиянинг 14 та денгизорти ҳудудларида яшовчи 128 миллиондан ортиқ аҳоли унинг суверенитетини тан олади.
Энг оммабоп сиёсий твит эса Барак Оабамага тегишлидир. 2012 йилда АҚШда президентлик сайловларида ғолиб чиққач, у «Яна тўрт йил» деб ёзиб, ўз рафиқаси Мишелни қучоқлаб тушган суратини илова қилган эди. Ушбу твит 24 соат ичида 771 635 марта ретвит қилинган.
Дунёдаги энг бадавлат ҳукмдор Таиланд Қироллиги қироли Пумипон Адульядет (Рама IX)дир. Forbes маълумотларига кўра, унинг шахсий бойлиги 30 миллиард доллар деб баҳоланган.
Ҳокимият тепасида туриш муддати бўйича рекордчи — Фидель Кастро. Куба инқилоби етакчиси 49 йил 10 ой 3 кун ҳукмдорлик қилган. Фақат монархларгина бу муддатдан ўзган.
Энг кўп сонли муваффақиятсиз суиқасдлар ҳам Фидель Кастрога нисбатан амалга оширилган. Куба инқилоби етакчисига қарши уни ўлдириш мақсадида 638 та фитна уюштирилган.
Сиримаво Бандаранаика — биринчи ва энг узоқ ҳукмронлик қилган аёлдир. У уч марта Шри-Ланка бош вазири лавозимини эгаллаб, бу мансаб остида жами 18 йил фаолият юритган.
Мария Эстела Мартинес де Перон — дунёдаги биринчи президент аёл. У 1974 йил 1 июлда турмуш ўртоғи президент Хуан Перон вафот этгач, ҳокимият тепасига келади. Бироқ бор-йўғи 2 йил ҳукмдорлик қилади: 1976 йил 24 мартда ҳарбий тўнтарув пайтида Перон президентликдан олиб ташланади.
2012 йилда АҚШдаги президентлик ва Конгрессга сайловлар энг кўп харажат талаб этган. Уларга тайёргарлик кўриш ва уларни ўтказиш учун 6 миллиард доллар сарфланган. Федерал сайлов комиссияси маълумотларига кўра, президентликка номзодларнинг ҳар иккаласи — Барак Обама ҳам, Мит Роммни ҳам сониясига 30,3 доллар сарфлаган.
Изоҳ (0)