БМТ Бош котиби Пан Ги Мун Ғазо секторида эришилган навбатдаги яраш сулҳини маъқуллади ва келишувнинг исроилликлар ёки фаластинликлар томонидан бузилиши «бутунлай масъулиятсизлик» деб қаралиши ҳақида огоҳлантирди. Бу ҳақда ИТАР-ТАСС хабар берди.
«50 кунлик оғир инсоний азоблар ва даҳшатли вайронагарчиликлардан сўнг ўт очишни тўхтатиш режимига риоя қилмаслик бутунлай масъулиятсизлик бўлади», — дейилади сешанба куни кечқурун БМТ маъмурий раҳбарининг канцелярияси томонидан тарқатилган баёнотда.
Пан Ги Мун шунингдек, яраш сулҳининг «барқарор тинчликка эришишнинг ягона усули бўлган сиёсий процесс муқаддимаси бўлиб хизмат қилишига» умид билдирди.
БМТ Бош котиби сулҳпарварлик ҳаракатлари Фаластин-Исроил низоларининг асл сабабларини ҳисобга олмаса, зўравонликнинг навбатдаги давраси фақатгина вақт масаласи бўлиши ҳақида огоҳлантирди.
«Ғазони тўлиқ Фаластин ҳукумати бошқарувига ўтказиш, у ердаги қамални тугатиш ҳамда Исроилнинг хавфсизлик соҳасидаги хавотирлари ўринли бўлиб чиққанини ҳисобга олиш керак», — деб ёзади Пан Ги Мун.
Унинг таъкидлашича, пировардида Фаластин-Исроил низолари иккита алоҳида давлат тузиб, араб ерларининг «47 йиллик истилоси»га барҳам бериш орқали тартибга солиниши керак.
Исроил ва Фаластин ўртасида муддатсиз яраш сулҳини тузиш ташаббусини Миср илгари сурди. Уни аввал Фаластин томони, сўнг исроилликлар ҳам маъқуллади. Келишув маҳаллий вақт билан 19:00 (Тошкент вақти билан 21:00)да кучга кирди.
8 июль, Исроил Ғазода ҳарбий операциясини бошлаганидан буён томонлар бир неча марта жанговар ҳаракатларда «гуманитар танаффус» қилишга келишган эди. Бироқ ҳар сафар ўт очишни тўхтатиш режими бузилар ёки у тугаши билан янги тўқнашувлар бошланиб кетар эди.
Изоҳ (0)