«Туркистон» саройида Ўзбекистон Республикаси давлат мустақиллигининг 23 йиллигига бағишлаб «Ягонасан, муқаддас Ватаним, севги ва садоқатим сенга бахшида, гўзал Ўзбекистоним!» шиори остида ташкил этилган «Энг намунали фуқароларнинг ўзини ўзи бошқариш органлари» танловининг мамлакат босқичи бўлиб ўтди. Бу ҳақда Ўзбекистон Миллий ахборот агентлиги хабар бермоқда.
Жорий йил Ўзбекистон «Маҳалла» хайрия жамоат фонди томонидан анъанавий тарзда ўтказиб келинаётган «Энг намунали фуқароларнинг ўзини ўзи бошқариш органлари» республика танловида Ўзбекистондаги барча маҳалла фуқаролар йиғинлари фаол қатнашди. Бу жараёнда истиқлол йилларида маҳаллалар фаолиятига кўрсатилаётган эътибор ва ғамхўрликдан, имконият ва шароитлардан қай даражада унумли фойдаланилаётгани, уларнинг ислоҳотлар жараёнидаги фаол иштироки, фуқароларнинг ўзини ўзи бошқариш органлари фаолиятига оид миллий қонунчиликнинг ҳаётга нечоғли кенг жорий этилаётганига алоҳида эътибор қаратилди. «Туркистон» саройи фойесида маҳаллалар фаолиятига оид стендлар, фотоальбомлардан иборат махсус кўргазмалар ташкил этилди.
Бу йилги танловда бешта асосий ўрин бўйича ғолиблар аниқланди:
1-ўрин: Бухоро вилояти Ғиждувон туманидаги «Тошлоқ» маҳалла фуқаролар йиғини (раиси Г.Шамсиева);
2-ўрин: Навоий шаҳридаги «Кимёгар» маҳалла фуқаролар йиғини (раиси Ў.Мирзаев);
3-ўрин: Тошкент шаҳар Шайхонтоҳур туманидаги «Шофайзи» маҳалла фуқаролар йиғини (раиси Б.Шамсиддинов);
4-ўрин: Сурхондарё вилояти Сариосиё туманидаги «Бўйрапўш» маҳалла фуқаролар йиғини (раиси А.Аҳмедова);
5-ўрин: Андижон вилояти Андижон туманидаги «Исломобод» маҳалла фуқаролар йиғини (раиси Қ.Йўлдошева).
Тадбирда Ўзбекистон Республикаси Бош вазирининг ўринбосари А.Икромов сўзга чиқди.
Изоҳ (0)