Ғазо секторини назорат қилувчи Фаластиннинг ҲАМАС радикал гуруҳи ҳозирги низони кескинлаштириб юборган, уч ўсмирнинг ўғирланиши ташкилот раҳбарияти билан келишилмаган тарзда амалга оширилганини айтди. Бу ҳақда 23 август куни CNN гуруҳ вакили Солиҳ Арурийга таяниб хабар берди.
Унинг сўзларига кўра, яҳудийлар мактаби ўқувчиларини ҳақиқатан ҳам ҲАМАС жангарилари ўғирлаган, бироқ бу ҳақда улар ўз қўмондонлигини хабардор қилмаган. Ўғирликни гуруҳ аъзолари амалга оширгани бироз вақт ўтибгина маълум бўлган. Арурий ушбу операция ҳеч ким билан келишилмаган ҳолда бўлганини таъкидлади.
Исроил ва Фаластин ўртасидаги қуролли низоларнинг янги босқичи 2014 йил ёзида — 12 июнь куни яҳудий диний мактабининг уч ўқувчиси йўқолиб қолгани маълум бўлгач, бошланиб кетди. Исроил бош вазир Биньямин Нетаньяху ҲАМАСни ўсмирларни ўғирлаганликда айблади. 1 июль куни уларнинг жасадлари Иордан дарёси қирғоқларида топилди.
Ғазо секторида жангариларга қарши «Мудофаа чегараси» операциясини Исроил 7 июль куни бошлади. Отишмалар, бомбардимонлар ва ракета зарбалари натижасида олти ҳафтада икки мингдан ортиқ фаластинлик ва 70 га яқин исроилликлар ҳалок бўлди. Томонлар Миср воситачилигида бир неча марта ярашиш ҳақида келишиб олишди. Бу сўнгги бора 13 августда содир бўлди, бироқ бир ҳафта ўтар-ўтмас ўзаро отишмалар қайтадан бошланди.
Изоҳ (0)