Қуролланган кишилар гуруҳи Либерия пойтахти Монровияда Эбола вируси билан касалланган шахслар карантин марказига ҳужум қилди, натижада марказда сақланаётган беморлар озодликка чиқиб кетди. Бу ҳақда Agence France-Presse’га асосланиб, ИТАР-ТАСС хабар берди.
Гувоҳлар сўзларига кўра, 16 августдан 17 августга ўтар кечаси жангарилар карантин маркази дарвозаларини бузиб, муассаса ҳудудини ағдар-тўнтар қилган. У ердаги 29 бемор қочиб чиқиб кетган.
Ғарбий Африка давлатларида авж олган Эбола вируси 1976 йилда ушбу вирус аниқланганидан буён энг йириги бўлди. Вирус Африкадаги нам тропик ўрмонлар яқинида тарқалмоқда.
Pteropodidae оиласига мансуб мевахўр кўршапалак вируснинг табиий тарқатувчиси ҳисобланади. Вируснинг географик тақсимланиши кўршапалаклар тарқалган жойлар билан мос тушиши мумкин.
Эбола безгаги Ғарбий Африкада февраль ойида авж олиб кетди. Ҳалигача унга қарши самарали вакцина яратилмади.
Эбола безгаги қурбонлари сони мингдан ошиб кетди, яна икки мингга яқин киши касалликни юқтириб олган. Энг кўп қурбонлар Гвинея, Либерия ва Сьерра-Леонеда қайд этилган.
Маълумот учун, Эбола безгаги қон, турли ажралма (тер, йиринг каби)лар, шунингдек, беморнинг заҳарланган буюмлари орқали юқиб, ўлимга олиб келиши мумкин. Ҳозирча мазкур касалликка қарши даво воситасини ишлаб чиқиш борасидаги ҳаракатлар самара бермади.
Изоҳ (0)