Индонезия полицияси даҳшатли ўлим ҳодисаси бўйича тергов ишларини олиб бормоқда. Бўлакланган аёл жасади Бали оролидаги меҳмонхоналардан бири ҳудудида жомадон ичидан топилган. Қотилликда гумон қилиниб аёлнинг 19 ёшли қизи ва қизнинг 21 ёшли дўсти ҳибсга олинди. USA Today хабар беришича, қўлга олинган қиз ҳомиладор бўлиб чиққан.
Америкалик Шейла фон Визе-Мак исмли аёл мурдаси меҳмонхона ҳудудида тўхтаб турган такси юкхонасидан топилган. Жасад бўлакланган ва жомадонга жойланган эди. Даҳшатли топилмадан бир кун ўтиб, аёлнинг қизи ва унинг дўсти қўлга олинган. Гувоҳлар кўрсатмаларидан келиб чиқиб, ҳуқуқ муҳофазачилари уларга айблов эълон қилди.
Полиция маълумотига кўра, ёшлар такси чақиришган, машина етиб келгач, юкхонага жомадон ортишган. Улар ҳайдовчидан кутиб туришни сўрашган, бироқ шу билан қайтиб келишмаган. Меҳмонхона соқчилари зиналарда қон изларини кўриб, ҳайдовчига тўғри полиция участкасига боришни таклиф қилишди. У ерда полициячилар жомадонда ўлдирилган аёл қолдиқларини топишган.
Ёшлар полицияга келтирилгач, улар аёлнинг қандайдир ўғрилар томонидан ўлдирилганини айтишган. Бироқ таксичи ва меҳмонхона ходимлари бошқача кўрсатмалар берган.
Кейинроқ маълум бўлишича, 62 ёшли америкалик аёл ва унинг қизи меҳмонхонага 9 август куни етиб келган, йигит эса икки кундан сўнг келган. Йигит ва аёл ўртасида жанжал содир бўлган, бу меҳмонхона фойесидаги видеокузатув камерасига муҳрланган.
Аёлнинг жасадини экспертизадан ўтказган мутахассислар унинг ўлим олдидан тана жароҳатлари олганини аниқлашди. Билагидаги чандиқлар ва синган тирноқлари унинг қотилга қаршилик кўрсатганидан дарак бериши айтилди.
Пировардида қиз онасининг ўлганини тасдиқлади, бироқ ўлим сабабини айтишдан бош тортди. У Балига онаси билан 4 август куни келгани ва бошқа меҳмонхонага тушгани маълум бўлди. Нима учун меҳмонхонани алмаштиришгани ҳақида ҳам қиз сўзлаб бермади. Унга маҳаллий адвокат ёлланди. Йигит эса АҚШдан ўзининг ҳуқуқшуноси келишини айтди. Ҳуқуқ муҳофазачилари сўзларига кўра, ёшлар терговга кўмак бериш истагида эмас ва кўп саволларга жавоб қилишдан бош тортмоқда.
Шу билан бирга, Чикаго полицияси она ва қиз яшаган уйга 2004—2013 йиллар давомида 86 марта чақирув бўйича боргани аниқланди. Чақирувлар кўпинча маиший жанжаллар, одам йўқолиши ёки майда ўғриликлар бўйича бўлган. Уларнинг ҳеч қайси бири ҳибс билан тугамаган. Қурбоннинг танишлари журналистларга у ва қизи ўртасида доимий келишмовчиликлар бўлиб турганини айтиб берди.
Изоҳ (0)