АҚШ полицияси Фергюсон шаҳридаги намойишчиларга қарши кўзни ёшлантирувчи газ ва тутун ҳосил қиладиган шашкалар қўллаганини тасдиқлади, дея хабар берди NBC News телеканали.
Аввалроқ ҳуқуқни муҳофаза қилувчи органлар вакиллари фақат тутун ҳосил қилувчи шашкалардан фойдаланганини айтган эди. Шу билан бирга, тасдиқланмаган маълумотларга кўра, тартибсизликлар бўлаётган туманда отишмалар эшитилган.
16 август куни Фергюсонда Миссури штати губернатори Жей Никсон қарори билан фавқулодда ҳолат эълон қилинди ва комендант соати (ҳарбий ёки қамал шароитида кўчаларда рухсациз юриш ман қилинган соатлар) жорий этилди.
Ушбу чора-тадбирлар полициячилар томонидан 18-ёшли қора танли ўспирин Майкл Браун ўлдирилганидан сўнг шаҳарда бошланиб кетган ва бир ҳафтадан буён давом этаётган тартибсизликлар юзасидан кўрилмоқда.
Полициячилар таъкидлашича, йигитча машинада бўлиб ўтган жангда ўқ тегиши натижасида бир нечта жароҳат олган. Бироқ гувоҳлар Брауннинг қуролланмаган бўлгани ва қўлларини тепага кўтариб турган пайтида отиб ташланганини айтмоқда. 14 август куни АҚШ президенти Барак Обама ўспириннинг ўлими бўйича тергов ишлари олиб бориш талаби билан чиқди.
Эслатиб ўтамиз, полиция томонидан қора танли ўсмирнинг отиб ўлдирилиши мамлакатдаги 90 та шаҳарда пайшанба ва жума кунлари эътироз намойишлари ўтказилишига олиб келди.
Бир неча минг аҳоли Нью-Йорк кўчаларига ҳам эътироз билан чиқди. Намойиш қатнашчилари марказий кўчалардан қўлларини юқорига кўтарган ҳолда «Қўллар тепага! Отманг!» деган сўзлар билан бақириб ўтди.
Лос-Анжелес, Сан-Диего, Атланта, Сиэтл, Майами, Филадельфия ва Вашингтонда ҳам шунга ўхшаш норозилик акциялари бўлиб ўтди.
Изоҳ (0)