«Чегара билмас шифокорлар» халқаро хайрия ташкилоти президенти Жоанна Лю Эбола безгагининг Ғарбий Африкада тарқалиб кетиши устидан назоратни қўлга олиш учун ярим йил зарур бўлишини айтди. Бу ҳақда «Сегодня» нашри хабар берди.
Унинг айтишича, айни пайтдаги вазият «уруш даври» билан тенг, шу сабабли Бутунжаҳон соғлиқни сақлаш ташкилотидан кўп куч талаб этилади. Либерияда вирусни енгиш орқалигина бутун Ғарбий Африкадаги вазиятни барқарорлаштириш мумкин.
Эбола безгаги Ғарбий Африкада февраль ойида авж олиб кетди. Ҳалигача унга қарши самарали вакцина яратилмади.
Эбола безгаги қурбонлари сони мингдан ошиб кетди, яна икки мингга яқин киши касалликни юқтириб олган. Энг кўп қурбонлар Гвинея, Либерия ва Сьерра-Леонеда қайд этилган.
Маълумот учун, Эбола безгаги қон, турли ажралма (тер, йиринг каби)лар, шунингдек, беморнинг заҳарланган буюмлари орқали юқиб, ўлимга олиб келиши мумкин. Ҳозирча мазкур касалликка қарши даво воситасини ишлаб чиқиш борасидаги ҳаракатлар самара бермади.
Изоҳ (0)