Qurollangan kishilar guruhi Liberiya poytaxti Monroviyada Ebola virusi bilan kasallangan shaxslar karantin markaziga hujum qildi, natijada markazda saqlanayotgan bemorlar ozodlikka chiqib ketdi. Bu haqda Agence France-Presse’ga asoslanib, “ITAR-TASS” xabar berdi.
Guvohlar so‘zlariga ko‘ra, 16-avgustdan 17-avgustga o‘tar kechasi jangarilar karantin markazi darvozalarini buzib, muassasa hududini ag‘dar-to‘ntar qilgan. U yerdagi 29 bemor qochib chiqib ketgan.
G‘arbiy Afrika davlatlarida avj olgan Ebola virusi 1976-yilda ushbu virus aniqlanganidan buyon eng yirigi bo‘ldi. Virus Afrikadagi nam tropik o‘rmonlar yaqinida tarqalmoqda.
Pteropodidae oilasiga mansub mevaxo‘r ko‘rshapalak virusning tabiiy tarqatuvchisi hisoblanadi. Virusning geografik taqsimlanishi ko‘rshapalaklar tarqalgan joylar bilan mos tushishi mumkin.
Ebola bezgagi G‘arbiy Afrikada fevral oyida avj olib ketdi. Haligacha unga qarshi samarali vaksina yaratilmadi.
Ebola bezgagi qurbonlari soni mingdan oshib ketdi, yana ikki mingga yaqin kishi kasallikni yuqtirib olgan. Eng ko‘p qurbonlar Gvineya, Liberiya va Syerra-Leoneda qayd etilgan.
Ma’lumot uchun, Ebola bezgagi qon, turli ajralma (ter, yiring kabi)lar, shuningdek, bemorning zaharlangan buyumlari orqali yuqib, o‘limga olib kelishi mumkin. Hozircha mazkur kasallikka qarshi davo vositasini ishlab chiqish borasidagi harakatlar samara bermadi.
Izoh (0)