КХДР ҳукумати Жанубий Корея ва АҚШнинг биргаликдаги ҳарбий ўқув машғулотларини ядро урушига тайёргарлик деб баҳоламоқда. Бу ҳақда Корея халқ армияси бош штаби расмий вакили баёнотига таяниб КХДР Марказий телеграф агентлиги хабар берди.
«Америка-Жанубий Корея ҳарбий машқлари мавжуд бўлмаган провокациялар баҳонаси билан уруш келтириб чиқариш мақсадида КХДРга зарба беришга тайёргарликка йўналтирилган. Биз яна бир марта таъкидлаймизки, ўз ихтиёримиз бўйича ҳар қандай вақтда энг кучли огоҳлантирувчи зарбани шафқатсиз равишда беришимиз мумкин», — дейилади баёнотда.
Ҳужжатда КХДР аскарлари «тажовуз ҳомийларини олов ва кул денгизига айлантириб юборишга тайёр»лиги ҳам айтилади. «Вашингтон ва Сеул биргаликдаги ҳарбий машғулотларини мунтазам ўтказиб туришини эълон қилди. Корея халқ армияси эса бунга йўл қўймаслик учун ўзининг барча кучларини ишга солади», — дея таъкидланади хабарда.
Жанубий Корея ва АҚШнинг биргаликдаги ҳарбий ўқув машғулотлари 18 августда бошланиши кутилмоқда. Сеул ва Вашингтон уларнинг мудофаа хусусиятига эга эканлигини эълон қилди.
Эслатиб ўтамиз, Шимолий Кореянинг ўзи 14 август куни ракета синовлари доирасида шарқий қирғоқдан Япон денгизига қарата учта қисқа масофага учувчи ракетани учирган эди.
Таъкидланишича, сўнгги ракета Рим папаси Франциск Жанубий Кореяга етиб келишидан 35 дақиқа аввал учирилган.
КХДР 30 июль куни ҳам кичик масофали тўртта ракетани учирган эди. Ўшанда икки ракета парвози муваффақиятсиз чиққан, қолган иккитаси эса 130 ва 210 километр узоқликкача учган эди.
Изоҳ (0)