KXDR hukumati Janubiy Koreya va AQShning birgalikdagi harbiy o‘quv mashg‘ulotlarini yadro urushiga tayyorgarlik deb baholamoqda. Bu haqda Koreya xalq armiyasi bosh shtabi rasmiy vakili bayonotiga tayanib KXDR Markaziy telegraf agentligi xabar berdi.
“Amerika-Janubiy Koreya harbiy mashqlari mavjud bo‘lmagan provokatsiyalar bahonasi bilan urush keltirib chiqarish maqsadida KXDRga zarba berishga tayyorgarlikka yo‘naltirilgan. Biz yana bir marta ta’kidlaymizki, o‘z ixtiyorimiz bo‘yicha har qanday vaqtda eng kuchli ogohlantiruvchi zarbani shafqatsiz ravishda berishimiz mumkin”, — deyiladi bayonotda.
Hujjatda KXDR askarlari “tajovuz homiylarini olov va kul dengiziga aylantirib yuborishga tayyor”ligi ham aytiladi. “Vashington va Seul birgalikdagi harbiy mashg‘ulotlarini muntazam o‘tkazib turishini e’lon qildi. Koreya xalq armiyasi esa bunga yo‘l qo‘ymaslik uchun o‘zining barcha kuchlarini ishga soladi”, — deya ta’kidlanadi xabarda.
Janubiy Koreya va AQShning birgalikdagi harbiy o‘quv mashg‘ulotlari 18-avgustda boshlanishi kutilmoqda. Seul va Vashington ularning mudofaa xususiyatiga ega ekanligini e’lon qildi.
Eslatib o‘tamiz, Shimoliy Koreyaning o‘zi 14-avgust kuni raketa sinovlari doirasida sharqiy qirg‘oqdan Yapon dengiziga qarata uchta qisqa masofaga uchuvchi raketani uchirgan edi.
Ta’kidlanishicha, so‘nggi raketa Rim papasi Fransisk Janubiy Koreyaga yetib kelishidan 35 daqiqa avval uchirilgan.
KXDR 30-iyul kuni ham kichik masofali to‘rtta raketani uchirgan edi. O‘shanda ikki raketa parvozi muvaffaqiyatsiz chiqqan, qolgan ikkitasi esa 130 va 210 kilometr uzoqlikkacha uchgan edi.
Izoh (0)