Амстердам халқаро аэропортида Украинадаги Малайзия «Боинг»и ҳалокатида қурбон бўлганларга атаб ёдгорлик ўрнатилади. Бу ҳақда аэропорт матбуот хизматига таяниб ИТАР-ТАСС хабар берди.
«Айни пайтда биз ҳайкал билан боғлиқ барча масалаларни ўйлаб кўрмоқдамиз, — деди аэропорт вакиллари. — Ёдгорлик пайдо бўлишини ишонч билан айта оламиз, бироқ унинг қаерга ўрнатилиши ва қандай кўринишда бўлиши ҳозирча аниқ эмас».
Ҳозирда аэропортдаги учинчи терминалнинг катта қисми самолёт ҳалокати қурбонларининг вақтинчалик ёдгорлигига айланган. Ҳалок бўлганлар хотирасига минглаб кишилар бу ерга гуллар, откриткалар ва юмшоқ ўйинчоқлар олиб келади.
Malaysia Airlines компанияси «Боинг»и 17 июль куни Украинанинг Донецк вилоятида ҳалокатга учради. Бортда бўлган 298 киши нобуд бўлди. Йўловчиларнинг катта қисми — 194 киши Нидерландия фуқаролари бўлган.
Изоҳ (0)