Исроил Ғазо секторида 12 соат давомида ўт очишни тўхтатишга рози бўлди. Сулҳ 26 июль, шанба куни соат 7:00 дан амал қилишни бошлайди, дея хабар бермоқда Agence France-Presse ахборот агентлигига асосланиб «Кун» нашри.
Ушбу ташаббусни Ғазо секторида Исроилга қарши кураш олиб бораётган ҲАМАС ҳаракати ҳам қўллаб-қувватлаган.
Айни вақтда, Франция дипломатик доираларидаги манбанинг маълум қилишича, Парижда Ғазода тинчлик сулҳига эришиш масаласида Франция, АҚШ, Буюк Британия, Германия, Италия, Қатар, Туркия ва Европа Иттифоқи ташқи ишлар вазирлари иштирокида учрашув бўлиб ўтади.
Аввалроқ, Исроил матбуоти расмий Тел-Авив Ғазо секторида фаластинлик жангариларига қарши олиб борилаётган операцияни тўхтатиш тўғрисидаги АҚШ давлат котиби Жон Керрининг таклифини рад этгани ҳақида хабар берганди.
Исроилнинг бу борадаги нуқтаи назарини Керрининг ўзи ҳам тасдиқлаган эди. Шу билан бирга, Миср ҳам Тел-Авивни Ғазо секторида етти кунлик гуманитар сулҳ имзолашга чақирганди. Ушбу чақирувни АҚШ давлат котиби ва БМТ бош котиби Пан Ги Мун қўллаб-қувватлаган.
Исроил 7 июлдан бери Ғазо секторида ҲАМАС жангариларига қарши «Мудофаа чизиғи» операциясини ўтказмоқда, бундан кўзланган мақсад ҲАМАС томонидан Исроил ҳудудларига берилаётган тинимсиз ракета зарбаларига барҳам беришдир.
Маълумот учун, Исроил ҳарбий операцияси бошланганидан бери Ғазода 800 дан ортиқ фаластинлик ҳалок бўлди, Исроил армияси эса 33 нафар ҳарбийни йўқотди.
Изоҳ (0)