Россия президенти Владимир Путин Малайзия «Боинг»ининг Украинадаги қулашида айбдор. Ушбу баёнот, Reuters ахборот агентлиги хабарига кўра, Оқ уй расмий вакили Жошуа Эрнест томонидан берилган, деб ёзади «Кун» нашри.
«Биз Malaysia Airlines самолёти ердан учирилган ракета орқали уриб туширилганини биламиз. У айирмачилар назорати остида бўлган ва Украина ҳаво ҳужумидан мудофаа тизими ишламаётган ҳудудда уриб туширилган», – деди Барак Обаманинг матбуот котиби.
«Биз шу сабабдан ушбу фожеада Владимир Путин ва руслар айбдор деган хулосага келдик», — дея қўшимча қилди Оқ уй расмий вакили Жошуа Эрнест.
Эслатиб ўтамиз, Malaysia Airlines’нинг «Боинг-777» самолёти 17 июль куни Украина шарқидаги, айирмачилар билан жанглар кетаётган Донецк вилоятида қулаган эди. Лайнер бортида 298 кишининг барчаси фожеа натижасида ҳалок бўлган.
Ҳодисанинг асосий сабаби сифатида «Боинг» ракета билан уриб туширилгани ҳақидаги тахмин илгари сурилмоқда. Айни вақтда, ҳам расмий Киев, ҳам россияпараст айирмачилар ушбу ҳодисага дахлдор эмасликларини таъкидлаб, бунда бир-бирларини мунтазам айблаб келишмоқда.
Аввалроқ АҚШ «Боинг» Украинадаги россияпараст айирмачилар томонидан уриб туширилганини бир неча бор таъкидлаган эди. Бироқ, шу билан бирга, АҚШ разведкаси Вашингтонда Россиянинг лайнер қулашига алоқадорлигини бевосита исботлайдиган далиллар йўқлигини тан олган.
Изоҳ (0)