Голландиянинг Just креатив агентлиги «Озодликнинг 99 куни» (99 Days of Freedom) номли лойиҳанинг ишга тушганини эълон қилди. Бу лойиҳада иштирок этишни хоҳловчилар 99 кун мобайнида ўз ихтиёри билан Facebook ижтимоий тармоғидан фойдаланмайди. Бу ҳақда «Российская Газета» хабар берди.
Just мутахассислари бу тажриба орқали ижтимоий тармоқдан воз кечиш иштирокчиларнинг ҳаётига қай даражада ижобий таъсир кўрсатишини аниқлайди. Facebook’нинг фойдали томонларини ёдга солиб, агентлик ходими ўзи ишонган «ижтимоий тармоқдан ме’ёр билан фойдаланиш руҳий фойда олиб келиши» ҳақидаги фикрни амалда синамоқчилигини айтди.
Лойиҳада иштирок этиш учун интернет фойдаланувчилари рўйхатдан ўтиб, ўз профилига 99 Days of Freedom белгисини ўрнатиши, шундан сўнг 99 кун мобайнида Facebook’ка кирмаслиги лозим.
Тажриба муддати уч ой мобайнида Facebook’дан воз кечиш одамларнинг жонига тегмаслигидан келиб чиқиб танланди. Бу вақт ичида тадқиқотчилар таҳлил учун керакли барча маълумотларни тўплашга улгуради.
Just агентлигининг аввалги тадқиқотларида фойдаланувчилар Facebook’ка ҳар куни ўртача 17 дақиқага кириши аниқланган. Мазкур лойиҳада иштирок этиш орқали улар ўзининг 28 соатини тежайди.
Бундан аввалроқ Facebook фойдаланувчиларга билдирмай уларнинг руҳиятига таъсир ўтказишга қаратилган тажриба ўтказган эди. Унда янгиликлар тасмасидан ижобий ёки салбий хабарлар ўчириб борилган. Натижалар шуни кўрсатдики, дўстлари фақат ижобий хабарлар жойлаштираётганини кўрган фойдаланувчилар томонидан ҳам ижобий постлар қолдирилади ёки аксинча.
Изоҳ (0)