Тошкентда Sony Xperia Z1 Compact смартфони 30 фоизга арзонлашиб, 1,2 млн сўмдан сотилмоқда

Ўзбекистонда сотила бошлаганидан буён Sony Xperia Z1 Compact смартфони нархи деярли 30 фоизга арзонлашди. Бу ҳақда Mobinfo.uz хабар берди.

Япон компаниясининг ўтган йилги флагман смартфони бўлмиш Sony Xperia Z1’нинг мини версияси Тошкентдаги «Флешка» савдо мажмуасида март ойининг ўрталарида 1,7 миллион сўмга сотила бошлаган эди.

Айни пайтда унинг нархи 1,2 миллион сўмга тушиб кетган. Sony Xperia Z1’нинг ўзи эса 1 миллион сўмдан сотилмоқда.

Эслатиб ўтамиз, Sony Xperia Z1 Compact чанг ва намликдан IP55/IP58 стандарти бўйича ҳимояга эгадир. У 1,5 метр чуқурликдаги сувда 30 дақиқагача туриши мумкин, бунда унга ҳеч қандай зиён етмайди.

Телефон 4,3 дюймли 1280×720 ўлчамли HD-дисплей, Qualcomm Snapdragon 800 тўрт ядроли процессор, 2 Гб ли тезкор хотира ва 16 Гб ли ички хотирага эга. Унга 64 Гб гача ҳажмда microSD ўрнатиш мумкин.

Асосий камераси 20,7 мегапиксель, олд камераси 2 мегапиксель.

Sony Xperia Z1 Compact Android 4.3 Jelly Bean операцион тизимида ишлайди. GPS, Bluetooth 4.0, Wi-Fi 802.11а/b/g/n/аs, microUSB 2.0, NFC’ни кўтара олади.

Смартфон 127×65×9,4 мм ўлчамга эга, оғирлиги 140 граммни ташкил қилади.