8 июлга ўтар кечаси Тас-IX тармоғи ишламай қолди

8 июлга ўтар кечаси соат тахминан 00:00 да Тас-IX тармоғи ишламай қолди. Бу ҳақда ижтимоий тармоқлардаги фойдаланувчилар постлари гувоҳлик бермоқда.

Facebook фойдаланувчиларидан бири хостинги Ўзбекистонда бўлган барча сайтлар очилмай қолганини ёзган. Хабарга қолдирилган изоҳларда бошқалар ҳам буни тасдиқлаган. Gov.uz, korzinka.uz, torg.uz, mover.uz ва бошқа сайтлар очилмаётгани таъкидланган.

Кўп ўтмай Facebookда Тас-IX ишламай қолганига бағишлаб мемлар пайдо бўлди. Улардан бирига билдирилган фикрларда интернет ишламай қолишига «Нега?» дея куйлаган Умиджон Шерматов сабаб бўлгани ҳазил сифатида келтирилган. «У кеча иккинчи видеосини Mover.uz’га жойлади. Бутун дунё бўйлаб одамлар уни ўша сайтдан юклаб олмоқда, шу сабабли ички тармоғимиз ишламай қолди», — дейилади изоҳда.

Тахминан 1:45 да Тас-IX ишлаб кетгани Facebook фойдаланувчилари томонидан айтилган.

«Ўзтелеком» телекоммуникация оператори матбуот хизмати ушбу носозлик бўйича расмий изоҳ бермаган. Бироқ унинг сайтига 3- ва 10 июль кунлари Россия ҳудудида авариявий ишлар олиб борилиши муносабати билан интернет хизматининг сифати ёмонлашиши эҳтимоли ҳақида хабар жойланган. Узнетда кузатилиши мумкин бўлган носозлик ҳақида ҳеч қандай маълумот йўқ.