Жорий йилнинг июнь ойида Тошкент шаҳри ва бир қатор ҳудудларда шакар маҳсулоти танқислиги кузатилиб, оқибатда баъзи савдо дўконларида шакар маҳсулоти чакана нархларининг асоссиз ошиши келиб чиқди.
Ўзбекистон Республикасининг Хусусийлаштириш, монополиядан чиқариш ва рақобатни ривожлантириш давлат қўмитаси ёзишича, шакар маҳсулоти «сунъий тақчиллиги»нинг келиб чиқишига асосий сабаб оддий олибсотарлик, шу жумладан ушбу маҳсулот бозорида фаолият кўрсатаётган улгуржи воситачилар ҳамда чакана савдо дўконлари ўртасида ўзаро тил бириктириш, келишиб ҳаракат қилиш ҳолатлари ҳам эҳтимолдан холи эмаслигидир.
«Юзага келган бу вазиятдан баъзи ноинсof истеъмолчилар чайқовчилик мақсадларида фойдаланмоқда, яъни улар йирик савдо дўконларидан кўп миқдорларда шакар маҳсулотни сотиб олиб, сўнгра уни юқори баҳоларда қайта сотмоқда», — дейилади қўмита хабарида.
Давлат рақобат қўмитаси томонидан ўтказилган таҳлил ишлари кўрсатишича, бугунги кунда мамлакатимизда шакар маҳсулоти тақчиллигини келтириб чиқарадиган ҳеч қандай объектив ва субъектив сабаблар ва омиллар йўқ.
Яъни, жорий йилнинг 1-ярим йиллигида шакар ишлаб чиқариш ҳажми ўтган йилнинг худди шу даврига нисбатан 14,7 фоизга ошган бўлса, биржа савдолари орқали сотилаётган шакарнинг миқдори эса режалаштирилган ҳажмдан деярли 4,7 фоизга кўп бўлган.Бу кўрсаткич, аҳоли истеъмол қиладиган ва саноат эҳтиёжи учун ишлатиладиган шакар маҳсулотининг ўсиш тенденциясига тўлиқ мос келади.
Таъкидлаш жоизки, шакар маҳсулотига бўлган ички талабни маҳаллий маҳсулот ҳисобига қондириш мақсадида, жорий йилнинг учинчи чорагида «Ангрен» махсус индустриал зонасида йиллик ишлаб чиқариш қуввати 300 минг тоннага мўлжалланган шакар ишлаб чиқариш заводини ишга тушириш кўзда тутилган.
Бундан ташқари, шакар маҳсулоти бозорида барқарорликни таъминлаш, юзага келган вазиятни юмшатиш ва истеъмолчилар ўртасида шов-шувларга барҳам бериш мақсадида, ҳукумат томонидан чакана савдо дўконларида сотилаётган шакар маҳсулотининг максимал нархи 1 кг учун 3200 сўмдан ошмаслиги белгилаб қўйилди.
Шунингдек, қўмита истеъмолчиларнинг диққатига жорий йилнинг июль ойи мобайнида савдо дўконларига қўшимча тарзда яна 12 минг тонна шакар ажратилиши ҳамда июль ойида биржа савдолари орқали сотиш мўлжалланган шакар 20 июлгача тў’лиқ савдога қўйилишини маълум қилди.
«Шундай қилиб, бугунги кунда меваларни консервация қилиш мавсумини ҳисобга олган ҳолда, шакар маҳсулотига бўлган талабни тўлиқ қоплаш имконияти мавжуд», — дейилади хабарда.
Юқорида келтирилганларни инобатга олган ҳолда, Давлат рақобат қўмитаси истеъмолчиларни асоссиз шов-шувларга эътибор бермасдан, зарур ҳажмларда шакар маҳсулотини сотиб олишга чақиради.
Шу билан бирга, Қўмита зиммасига юклатилган вазифалар доирасида, мамлакатимизда шакар маҳсулотининг «сунъий танқислиги»ни келтириб чиқарувчи сабабларни ўрганиш, унга йўл қўймаслик мақсадида, шакар маҳсулоти билан савдо қилувчи улгуржи ва чакана бўғинлар фаолиятини ўрганиш ишлари бошланганлиги ҳақида маълум қилди.
Ўрганиш натижаларига кўра, шакар маҳсулоти бозори иштирокчилари ўртасида келишувлар ёки келишиб қилинган ҳаракатлар аниқланганда, Давлат рақобат қўмитаси томонидан монополияга қарши ишлар қўзғатилиб, қонунчилик талабларига асосан уларга нисбатан ҳуқуқий чоралар қўлланилади.
Изоҳ (0)