8 июль куни Тошкент вақти билан 20:58 да Қозоғистондаги Бойқўнғир космодромида «Союз- 2.1б» элтувчи ракетаси муваффақиятли учирилди. У орбитага еттита сунъий йўлдошни олиб чиқди. Бу ҳақда «Роскосмос» сайти хабар берди.
Кўп ўтмай ижтимоий тармоқларгда Тошкент осмонида ғалати «нарса» пайдо бўлгани ҳақида постлар жойланди. Илова қилинган суратларда осмонни кесиб ўтган тутунли ёрқин изни кўриш мумкин. «Осмонимизда алламбало кўринди!!! Бу нима экан, кимдир кўрдими?» — дейилади хабарда.
Бундай ҳодиса биринчи марта содир бўлмаётгани учун, бу борада «тажрибали» фойдаланувчилар унинг ракетага тегишли из эканини дарҳол маълум қилишган ва жавоб ишонарли бўлиши учун Бойқўнғирда ракета учирилгани ҳақидаги хабарни қўшимча қилишган.
Бироқ ҳазилкаш фойдаланувчилар расмда учар ликопча муҳрланганини айтишган, баъзилар эса ҳодисани Келесдаги «махлуқ» билан боғлашган. Яна кимдир воқеага илмий ёндашиб, ёрқин тутун кумушранг булутга тегишли эканини таъкидлаган.
Изоҳ (0)