Япония Шимолий Кореяга нисбатан жорий қилинган санкцияларнинг бир қисмини бекор қилади. Бу ҳақда мамлакат бош вазири Шинзо Абе баёнот берди, дея хабар қилади «РИА Новости».
2006 йилда БМТ Хавфсизлик Кенгаши санкцияларига қўшимча равишда Япония КХДРга қарши ўз чораларини қўллаган эди. Улар импорт-експорт етказилишини, фуқаролар сафарларини, Шимолий Корея кемаларининг Япония портларига киришини тақиқлайди. 2009 йилдан Токио Япониядан КХДРга пул ўтказмалари учун шартларни қийинлаштирди. 2013 йил апрелида санкциялар яна икки йилга чўзилди.
Шимолий Корея 1970—80 йилларда ўғирлаб кетилиб, КХДРда куч билан сақланаётган японияликлар тақдирини тергов қилса, Япония санкцияларнинг бир қисмини бекор қилишга ваъда берди.
Тергов бошланиши билан фуқаролар сафарларига ва Шимолий Корея кемаларининг япон портларига гуманитар мақсадларда киришига қўйилган тақиқлар олиб ташланади, шунингдек пул ўтказмаларига жорий қилинган чекловлар камайтирилади.
Токионинг таъкидлашича, 1970 йилларда КХДР махсус хизматлари Япониядан 17 фуқарони ўғирлаб кетган. КХДР эса уларнинг сони 13 та эканини айтмоқда. Гаровдагиларнинг беш нафари музокаралар натижасида ўз ватанига қайтган, қолган саккиз киши, КХДР таъкидлашича, вафот этган. Бироқ Япония буни ёлғон маълумот деб ҳисоблаб, уларнинг иши қайтадан тергов қилинишини талаб қилмоқда.
Изоҳ (0)