Ўзбекистонда Жанубий Кореянинг LS Mtron тракторлари йиғила бошлади

«Ўзавтосаноат» Акциядорлик компанияси шўба корхонаси бўлган AgromashSanoatInvest МЧЖ (ASI) Жанубий Кореянинг LS Mtron компанияси лицензияси бўйича мини-тракторлар йиғишга киришди. Бу ҳақда ASI бош директори ўринбосари Рустам Сайдалиев маълум қилди, деб ёзади «Новый век».

«TTZ LS маркаси остидаги тракторларни йиғиш «Тошкент трактор заводи» ОАЖда йўлга қўйилган, — деди Рустам Сайдалиев. — 2014 йил охиригача қуввати 30 дан 85 тагача от кучига тенг олти модификациядаги мингта машинани йиғиш режалаштирилган».

2013 йил декабрида AgromashSanoatInvest LS Mtron билан стратегик ҳамкорлик ҳақида битим имзолаган. У 2014—2018 йилларда Ўзбекистонда 24 570 та мини-трактор ишлаб чиқаришни кўзда тутади. Шартнома қиймати 500 миллион долларни ташкил этади.