Франция Институти юридик мақоми Ўзбекистон қонунчилигига зид бўлгани туфайли ёпилгани хабар қилинди

Душанба куни маданий ва маърифий тадбирларга ташкилотчилик қилиш билан шуғулланган Ўзбекистондаги Франция Институти ёпилиши хабар қилинди. Тошкентдаги Франция элчихонасининг Gazeta.uz’га маълум қилишича, муассаса ёпилишига Франция Институти юридик мақомининг Ўзбекистон қонунчилиги билан мос тушмаслиги сабаб бўлган.

Институт пулли француз тили курсларини тақдим этган, улар ўзбек томони билан мақбул ва узоқ муддатли ечим топиш учун 2014 йил 1 январидан тўхтатилган.

Айни пайтда Франция ва Ўзбекистон ишчи гуруҳлари ўртасида Ўзбекистондаги турли идоралар иштирокида музокаралар бормоқда. Хусусан, Франция Альянсини қайтадан очиш имконияти ҳам кўриб чиқилмоқда.

Агарда альянс Ўзбекистон Адлия вазирлиги қошида ноҳукумат муассаса сифатида рўйхатдан ўтса, у француз тили бўйича курсларни ҳам тиклаши мумкин бўлади.

Ўзбекистондаги Франция Институти 2011 йил баҳорида 2002 йил январида очилган Виктор Гюго номидаги Франция маданият маркази базасида ташкил қилинган.