Ўзбекистон олий таълим муассасаларида васийлик кенгашлари тузилади
Вазирлар Маҳкамасининг 24 майдаги қарори билан Олий таълим муассасасининг васийлик кенгаши тўғрисидаги намунавий низом тасдиқланди.
Ҳужжат олий таълим муассасалари жамоатчилик бошқарувининг самарали тизимини янада ривожлантириш, таълим жараёнида ижтимоий шериклик тамойилларини амалга ошириш мақсадида қабул қилинди.
Ушбу Намунавий низом Олий таълим муассасасининг васийлик кенгаши фаолиятини тартибга солади, у олий ҳарбий таълим муассасаларига татбиқ этилмайди.
Васийлик кенгаши Ўзбекистон Республикасининг ҳар бир олий таълим муассасасида ташкил этилади. У юридик шахс ҳисобланмайди. Кенгаш ўз фаолиятини жамоатчилик асосида амалга оширади.
Кенгаш таркибига давлат органларининг, нодавлат нотижорат ташкилотларининг вакиллари, ҳомийлар, шунингдек олий таълим муассасаси фаолиятини такомиллаштириш ва ривожлантиришдан манфаатдор бўлган бошқа юридик ва жисмоний шахслар кириши мумкин.
Кенгашнинг таркиби тасарруфида тегишли олий таълим муассасаси бўлган вазирлик ва идора томонидан тасдиқланади. Кенгаш, қоидага кўра, Кенгаш раиси, раиснинг ўринбосари, котиб ва аъзоларидан иборат таркибда шакллантирилади.
Кенгашнинг сон таркиби тартибга солинмайди. Кенгашнинг шахсий таркиби ва раҳбариятидаги ўзгаришлар, қоидага кўра, бир йилда бир марта амалга оширилади.
Олий таълим муассасасининг ректори (директори) лавозимига кўра Кенгаш аъзоси ҳисобланади.
Кенгаш қарори Кенгашнинг мажлисда қатнашган аъзоларининг оддий кўпчилик овози билан қабул қилинади. Овозлар тенг бўлган тақдирда Кенгаш раисининг овози ҳал қилувчи ҳисобланади.
Кенгаш маблағлари вакиллари Кенгаш аъзолари ҳисобланадиган ташкилотларнинг, шунингдек Кенгаш аъзоларининг хайрия эҳсонлари, ихтиёрий бадаллари шаклида Кенгаш томонидан олий таълим муассасасига жалб этиладиган бюджетдан ташқари маблағлар, шунингдек қонун ҳужжатларида тақиқланмаган бошқа маблағлар ҳисобига шакллантирилади. Кенгаш маблағлари мол-мулк, пул маблағлари, бошқа моддий ва номоддий активлар шаклида киритилади.
Тасарруфида олий таълим муассасалари бўлган вазирликлар, давлат қўмиталари ва идораларга бир ой муддатда тасарруфидаги олий таълим муассасаларида васийлик кенгашлари ташкил этилишини ва уларнинг шахсий таркиби тасдиқланишини; ўзлари қабул қилган норматив-ҳуқуқий ҳужжатларнинг ушбу қарорга мувофиқлаштирилиш юклатилди.
