КХДР 22 май куни Корейс халқ армияси (КХА) кемалари Сариқ денгизда Жанубий Кореяга тегишли кемани ўққа тутгани ҳақидаги маълумотни рад этди. Бу ҳақда «ИТАР-ТАСС» хабар берди.
Корея халқ армияси жануби-ғарбий фронти баёнотида айтилишича, Сеулдагилар «Ёнпхёндо ороли ҳудудида КХА Жанубий Корея ҳарбий кемасига қарата ўт очгани, уларнинг бунга жавобан бир неча марта ўқ отгани ҳақидаги маълумотларни тўқиб чиқарган». Ҳужжатда таъкидланишича, аслида Жанубий Корея ҳарбий кемалари «ҳарбий денгиз чегара чизиғини кесиб ўтиб, КХДР ҳудудий сувларига бостириб кирган ва Хитойнинг тинч балиқчи кемаларини қўлга олиш учун ўт очган».
«Жанубий Корея ушбу ҳодиса учун жавобгарликни КХДР бўйнига илиш мақсадида мана шу туҳматни ўйлаб чиқарган», - деб ҳисоблайди Пхенян.
Сеул тарқатган маълумотларга кўра, Шимолий Кореянинг ҳарбий кемаси Жанубий Кореянинг патруль кемаси томон иккита снаряд отган. Бунга жавобан, Жанубий Корея бир неча қуролдан бараварига ўт очиш билан жавоб берган. Ҳодиса Сариқ денгиздаги Ёнпхёндо ороли томондаги денгиз чегараси яқинида содир бўлган.
Изоҳ (0)