Бугун,

  • USD 11014.01
  • RUB 191.8
  • EUR 10674.78

29 апрель куни Алоқа, ахборотлаштириш ва телекоммуникация технологиялари давлат қўмитаси томонидан Тошкент ахборот технологиялари университетида Тошкент шаҳридаги Инҳа университети фаолиятига бағишланган видеомулоқот ташкил этилди. «Электрон таълим» тармоғида 40 дан зиёд академик лицей, касб-ҳунар коллеж ҳамда олий таълим муассасаларини бирлаштирган онлайн мулоқотда юртимизнинг барча ҳудудларидан битирувчилар, абитуриентлар ҳамда талабалар ва уларнинг ота-оналари, ўқитувчилар — жами 3 мингга яқин иштирокчилар қатнашдилар. Бу ҳақда infocom.uz хабар берди.

Фото: infocom.uz

Фото: infocom.uz

Аввал хабар берганимиздек, Ўзбекистон Республикаси Президенти томонидан жорий йилниинг 24 март куни «Тошкент шаҳрида Инҳа университетини ташкил этиш тўғрисида»ги қарори имзоланган эди. 22 апрель куни мазкур университет фаолиятига бағишланган матбуот анжуманидан сўнг Жанубий Кореянинг Инҳа университети вакиллари бир ҳафта мобайнида юртимизнинг Наманган, Андижон, Фарғона, Самарқанд, Навоий ҳамда Бухоро вилоятларида Тошкент шаҳридаги Инҳа университети фаолияти, қабул жараёнига бағишланган мулоқотларда иштирок этиб қайтишди.

Видеоконференциядан кўзланган асосий мақсад республикамизнинг барча ҳудудларида жойлашган академик лицей, касб-ҳунар коллежлари битирувчилари, абитуриентларни Тошкент шаҳридаги Инҳа университети фаолияти, талабаларни саралаб олиш жараёнлари билан яқиндан таништириш, ёшларни қизиқтирган саволларига жавоб беришдан иборат.

Инҳа университети (Жанубий Корея) Қабул комиссияси декани Ким Жун Хо университет таълим тизими, жаҳон ва Корея ахборот технологиялари саноатидаги ўрни хусусида тўхталиб, Тошкент шаҳридаги Инҳа университетида ҳам халқаро андозаларга жавоб берадиган, ахборот-коммуникация технологиялари соҳасининг етук мутахассисларини тайёрлаш учун барча зарур шарт-шароитлар яратилишини, мазкур университет қисқа давр ичида нафақат Ўзбекистонда, балки Марказий Осиёда ахборот технологиялари йўналишида кадрлар тайёрлаш бўйича ўз нуфузига эга бўлишидан Ўзбекистон ва Жанубий Корея ҳукуматлари, шунингдек Инҳа университети учун ҳам бирдек манфаатдор эканлигини таъкидлади.

Видеомулоқотда ёшларга Тошкент шаҳридаги Инҳа университети қабул жараёнлари хусусида батафсил маълумот берилди. Ўзбекистон Республикаси мактаб, академик лицей ҳамда касб-ҳунар коллежлари таълим дастурлари асосида тузилган физика ва математика фанларидан саволларга инглиз тилида ёзма, инглиз тилида оғзаки имтиҳонларда талабанинг нафақат билими, шу билан биргаликда унинг масала ва мисоллар ечимини аниқлашдаги мантиқий ёндашуви, инглиз тилида ўз фикр-мулоҳазасини баён эта олиш кўникмалари синовдан ўтказилади.

Видеомулоқотда имтиҳон саволларидан намуналар келтирилиб, уларни ишлашда нималарга эътибор қаратилиши кераклиги ҳақида тушунтиришлар берилди. Шунингдек, тадбирда абитуриентлар намунавий саволлар билан Тошкент шаҳридаги Инҳа университетининг интернет тармоғидаги www.inha.uz веб-сайти орқали ҳам танишиш имкониятига эга бўлишлари қайд этилди.

Видеомулоқот мобайнида барча иштирокчилар ўзларини қизиқтирган масалалар юзасидан маълумотга эга бўлдилар.

Изоҳ
Асосий янгиликлар