«Ижтимоий фикр»жамоатчилик фикрини ўрганиш маркази «Ўзбекистон аҳолисининг репродуктив йўналиши»мавзусида сўров ўтказди. Сўров натижалари «Правда Востока» газетасининг 29 апрель, сешанба сонида эълон қилинди, деб ёзади «Кун» нашри.
Сўров натижаларига кўра, Ўзбекистондаги оилаларнинг 25 фоизи икки фарзанд, 23,6 фоизи эса уч фарзандни тарбия қилмоқда. Эътиборли томони, икки фарзандли оилаларнинг аксарияти қишлоқ жойларда истиқомат қилади. Қишлоқ оилаларининг 14,5 фоизида тўрт бола бор. Республика оилаларининг 6,5 фоизи беш фарзандга, 4,9 фоизи эса олти фарзандга эга.
Айни вақтда, сўровнома давомида берилган: «Оилада қанча фарзанд бўлгани яхши?»қабилидаги саволга ўзбекистонликларнинг аксарияти «тўрт нафар»деб жавоб берган. Қишлоқ аҳолисининг кўпчилиги – 37,6 фоизи бу рақамни энг тўғри деб билади, шу билан бирга, шаҳарликларнинг 31,7 фоизига икки фарзанд айниқса мақбул.
Эътиборли томони, сўровнома иштирок этганлар орасидаги 21 ёшдан 24 ёшгача ва 25 ёшдан 29 ёшгача бўлганларнинг кўпчилиги (мос равишда 37,3 ва 32,6 фоизи) икки фарзанди бўлишини хоҳлашини маълум қилган. Нисбатан катта ёшлилар – 30 ёшдан 39 ёшгача бўлганларнинг 33,5 фоизи эса оилада тўрт нафар фарзанд бўлиши керак деб ҳисоблайди, 40 ёшдан 49 ёшгача бўлган аёл ва эркаклар орасида бу фикрга қўшилувчилар сони янада кўпроқ – 41,8 фоиз.
Сўровномада қатнашганларнинг 25,2 фоизи икки фарзандли бўлишни, 24,7 фоизи эса уч, 17,8 фоизи тўрт фарзандли бўлишни режалаштирмоқда. Тўрт фарзандли оила ташкил этиш ниятида бўлганларнинг 21 фоизини шаҳарликлар, 14,2 фоизини эса қишлоқ аҳолиси ташкил қилади. «Болалар сонини белгиловчи омиллар сифатида оиланинг иқтисодий аҳволи ва эр-хотинларнинг саломатлиги кўрсатилаётгани ҳам эътиборга молик», – деб ёзади газета.
Ўзбекистондаги оилаларнинг 91,3 фоизи болаларнинг маънавий тарбияси ҳақида қайғуради, айни вақтда, сўровномада иштирок этганларнинг 41,9 фоизи тўғриликни ахлоқ-одобнинг асосий белгиси деб билса, 37,9 фоизи ватанпарварлик ва Ватанга нисбатан муҳаббатни, 36,1 фоизи эса миллий қадриятларга ҳурматни ҳисоблайди. «Ўзбекицондаги жуда кўпчилик оилаларда янги авлодга мустаҳкам одоб асослари, юксак маънавий ахлоқ тамойиллари сингдирилмоқда», – дейилади «ПВ»мақоласида.
Сўровнома қатнашганларнинг 59,7 фоизининг фикрича, маънавий соғлом болалар ҳам ота, ҳам онаси бўлган оилаларда тарбия топади. 31,1 фоиз иштирокчиларнинг қайд этишича, бува ёки буви томонидан бошқариладиган оила маънавий соғлом авлоднинг етилишига кўпроқ таъсир кўрсатади. «Маънавий-ахлоқий соғлом, Ватанга содиқ болалар меҳнацевар, тўғри, маънавий соғлом ва аҳил оилаларда тарбия топишига кўпчилик ўзбекистонликларнинг ишончи комил», – деб қўшимча қилинади «Правда Востока»да.
Изоҳ (0)