Халқаро меҳнат ташкилоти (ХМТ) Ўзбекистон ҳукумати ва мамлакатдаги ижтимоий ҳамкорлар билан 2014—2016 йиллар учун техник ҳамкорлик дастурини имзолади. Бу ҳақда БМТнинг Ўзбекистондаги ваколатхонаси хабар берди.
Адолатли меҳнат дастурини 25 апрель куни Меҳнат ва аҳолини ижтимоий ҳимоя қилиш вазири Аҳмат Ҳайитов, Савдо-саноат палатаси раиси Алишер Шайхов ва Ўзбекистон Касаба уюшмалари федерацияси раиси Танзила Норбоева имзолади.
ХМТ номидан дастурни Адолатли меҳнат масалалари бўйича техник кўмак гуруҳи ҳамда Шарқий ва Марказий Осиё учун ХМТ бюроси директори Димитрина Димитрова имзолади.
Адолатли меҳнат дастури ХМТ ва Ўзбекистон ҳамкорлигининг чегаралари ва муҳим масалаларини белгилайди. У меҳнат соҳасига халқаро меҳнат меъёрлари, қоидалари ва тамойилларини киритиш, ижтимоий диалогни ривожлантириш ва бошқаларни назарда тутади.
Шунингдек, дастур болалар меҳнатидан фойдаланишни бартараф этиш Миллий режаси амалга оширилишини қўллаб-қувватлайди. У қишлоқ хўжалиги, жумладан пахтакорликда меҳнат ва бандлик шароитларини яхшилашга ҳам йўналтирилади.
Изоҳ (0)