Бирлашган Миллатлар ташкилотининг Болалар жамғармаси (ЮНИСЕФ) Ўзбекистон халқи ва ҳукумати билан ҳамкорлигининг 20 йиллиги муносабати билан ўзининг уч тилдаги сайтини тақдим этади. Мазкур йилда яна бир юбилей — БМТ Бош Ассамблеяси Бола ҳуқуқлари тўғрисидаги конвенцияни қабул қилганининг 25 йиллиги нишонланади. Бугунги кунда конвенция дунё миқёсида энг кўп мамлакатлар қўшилган халқаро ҳужжат бўлиб ҳисобланади. 192 мамлакат ҳукуматлари болаларнинг, хусусан қийин аҳволда қолган болаларнинг ҳуқуқларини ҳимоя қилиш мажбуриятини олган.
UzDaily хабар беришича, янги www.unicef.uz сайтида ўзбек, инглиз ва рус тилларида ахборот берилган бўлиб, у фойдаланувчиларнинг эҳтиёжларига жавоб беради. Интерфейснинг умумий кўриниши ва дизайни содда бўлган ҳолда, унинг навигация, маълумот излаш ва ишлатиш функциялари жуда осондир.
Сайт тузилмаси нафақат мутахассислар ва Интернетнинг фаол фойдаланувчилари учун, балки болалар, катта ёшдагилар ҳамда компьютердан фойдаланишни энди ўрганаётганлар учун қулай қилиб яратилган. Шунингдек ахборот технологияларини билиш имкониятлари кенг бўлмаган қишлоқ аҳолисининг имкониятилари ҳам эътиборга олинган. ЮНИСЕФнинг маҳаллий сайти портал бўлиб, болалар, ўсмирлар, ота-оналар, мутахассислар, шунингдек қарорлар қабул қилувчи расмий шахслар учун қизиқарли ва фойдали бўлган ахборотга эга.
Ўзбекистондаги болалар вазиятининг шарҳи ҳамда ЮНИСЕФнинг ҳамкорлар билан биргаликда бола ҳуқуқларини илгари суришга ва уларнинг фаровонлигини оширишга қаратилган дастурлари тўғрисида сайтда маълумот берилган. Шунингдек турли нашрлар ва мультимедиа материаллари тўплами, асосий ҳамкор ташлилотлар рўйхати тақдим этилган. Ота-оналар бола тарбиясидаги энг илғор тажриба билан танишишлари, болалар ва ўсмирлар эса ўз ҳуқуқлари ва мажбуриятларини янада яхши ўрганишлари мумкин. Сайт уларни яшаш жойларидаги жамоат тадбирларида иштирок этишга рағбатлантиради.
«Болалар ва оилаларнинг имкониятларини кенгайтириш ЮНИСЕФнинг дунё миқёсидаги, хусусан Ўзбекистондаги фаолиятининг устувор йўналишларидан биридир», — деди ЮНИСЕФнинг мамлакатдаги ваколатхонаси раҳбари Роберт Фудерич. — Қимматли ресурслар ва ахборотни тақдим этиш орқали бизнинг янги сайтимиз ана шу мақсадга эришишга кўмак беради».
Изоҳ (0)