29-aprel kuni Aloqa, axborotlashtirish va telekommunikatsiya texnologiyalari davlat qo‘mitasi tomonidan Toshkent axborot texnologiyalari universitetida Toshkent shahridagi Inha universiteti faoliyatiga bag‘ishlangan videomuloqot tashkil etildi. “Elektron ta’lim” tarmog‘ida 40 dan ziyod akademik litsey, kasb-hunar kollej hamda oliy ta’lim muassasalarini birlashtirgan onlayn muloqotda yurtimizning barcha hududlaridan bitiruvchilar, abituriyentlar hamda talabalar va ularning ota-onalari, o‘qituvchilar — jami 3 mingga yaqin ishtirokchilar qatnashdilar. Bu haqda infocom.uz xabar berdi.
Avval xabar berganimizdek, O‘zbekiston Respublikasi Prezidenti tomonidan joriy yilniing 24-mart kuni “Toshkent shahrida Inha universitetini tashkil etish to‘g‘risida”gi qarori imzolangan edi. 22 aprel kuni mazkur universitet faoliyatiga bag‘ishlangan matbuot anjumanidan so‘ng Janubiy Koreyaning Inha universiteti vakillari bir hafta mobaynida yurtimizning Namangan, Andijon, Farg‘ona, Samarqand, Navoiy hamda Buxoro viloyatlarida Toshkent shahridagi Inha universiteti faoliyati, qabul jarayoniga bag‘ishlangan muloqotlarda ishtirok etib qaytishdi.
Videokonferensiyadan ko‘zlangan asosiy maqsad respublikamizning barcha hududlarida joylashgan akademik litsey, kasb-hunar kollejlari bitiruvchilari, abituriyentlarni Toshkent shahridagi Inha universiteti faoliyati, talabalarni saralab olish jarayonlari bilan yaqindan tanishtirish, yoshlarni qiziqtirgan savollariga javob berishdan iborat.
Inha universiteti (Janubiy Koreya) Qabul komissiyasi dekani Kim Jun Xo universitet ta’lim tizimi, jahon va Koreya axborot texnologiyalari sanoatidagi o‘rni xususida to‘xtalib, Toshkent shahridagi Inha universitetida ham xalqaro andozalarga javob beradigan, axborot-kommunikatsiya texnologiyalari sohasining yetuk mutaxassislarini tayyorlash uchun barcha zarur shart-sharoitlar yaratilishini, mazkur universitet qisqa davr ichida nafaqat O‘zbekistonda, balki Markaziy Osiyoda axborot texnologiyalari yo‘nalishida kadrlar tayyorlash bo‘yicha o‘z nufuziga ega bo‘lishidan O‘zbekiston va Janubiy Koreya hukumatlari, shuningdek Inha universiteti uchun ham birdek manfaatdor ekanligini ta’kidladi.
Videomuloqotda yoshlarga Toshkent shahridagi Inha universiteti qabul jarayonlari xususida batafsil ma’lumot berildi. O‘zbekiston Respublikasi maktab, akademik litsey hamda kasb-hunar kollejlari ta’lim dasturlari asosida tuzilgan fizika va matematika fanlaridan savollarga ingliz tilida yozma, ingliz tilida og‘zaki imtihonlarda talabaning nafaqat bilimi, shu bilan birgalikda uning masala va misollar yechimini aniqlashdagi mantiqiy yondashuvi, ingliz tilida o‘z fikr-mulohazasini bayon eta olish ko‘nikmalari sinovdan o‘tkaziladi.
Videomuloqotda imtihon savollaridan namunalar keltirilib, ularni ishlashda nimalarga e’tibor qaratilishi kerakligi haqida tushuntirishlar berildi. Shuningdek, tadbirda abituriyentlar namunaviy savollar bilan Toshkent shahridagi Inha universitetining internet tarmog‘idagi www.inha.uz veb-sayti orqali ham tanishish imkoniyatiga ega bo‘lishlari qayd etildi.
Videomuloqot mobaynida barcha ishtirokchilar o‘zlarini qiziqtirgan masalalar yuzasidan ma’lumotga ega bo‘ldilar.
Izoh (0)