Toshkentdagi Parlamentlararo ittifoq tadbirida Zambiya vakili vafot etdi

Toshkentda bo‘lib o‘tayotgan Parlamentlararo ittifoq tadbirida 7-aprel kuni Zambiya vakili Roy Ngulube vafot etdi. 

Zambiya Milliy assambleyasi kotibining vafotiga kasallik sabab bo‘lgan. Ngulube Milliy assambleya spikeri Nelli Mutti boshchiligidagi delegatsiya tarkibida Toshkentdagi tadbirda ishtirok etayotgan edi.

Spiker Mutti hamkasbini yo‘qotganidan chuqur qayg‘uda ekanini aytib, bu muassasa hamda butun mamlakat uchun katta yo‘qotishligini bildirdi.

Milliy assambleya janob Ngulubening o‘limidan hayratda va qayg‘uda, uning mamlakat oldidagi sharafli xizmatlarini e’tirof etadi, dedi u.

Roy Ngulube yigirma yildan ortiq vaqt davomida parlamentda xizmat qilgan. U 2002-yil 15-aprelda Milliy assambleyaga a’zo bo‘lgan va bir qator muhim lavozimlarda faoliyat yuritgan. Uning dastlabki lavozimlari: 2006—2008-yillarda Janubiy Afrika taraqqiyot hamjamiyati parlament forumining qo‘mita kotibi yordamchisi va bosh kotibning ijrochi yordamchisi bo‘lgan.

2009—2015-yillarda spikerning ijrochi yordamchisi, 2016—2022-yillarda kotib o‘rinbosari lavozimida ishlagan. Ngulube 2023-yil sentyabr oyida Milliy assambleya kotibi etib tayinlangan va bu lavozimda vafotigacha ishlagan. Marhumning jasadini vataniga qaytarish va dafn marosimi bilan bog‘liq qo‘shimcha tafsilotlar e’lon qilinishi kutilmoqda.