Qirg‘iziston parlamenti deputati Dastan Bekeshev qirg‘izistonliklar avtomobillarining oynalari qoraytirilgan bo‘lsa, O‘zbekiston hududidan o‘tish uchun 15 dollar to‘lashga majbur bo‘layotganini ma’lum qildi. U Jogorku Kenesh majlisida javob choralarini ko‘rish yoki yig‘imni bekor qilishga erishishni taklif etdi.
Bekeshev tashqi ishlar vaziri Jeenbek Kulubayevga Qirg‘iziston fuqarolari Jalolobod viloyatidan Botkenga borish va qaytish uchun O‘zbekiston hududidan o‘tishga majbur ekanliklarini, qo‘shni davlat esa avtomobilning orqa oynalari qoraytirilgan bo‘lsa, qirg‘izistonliklardan 15 dollardan yig‘ayotganini ma’lum qildi.
“Har bir mashina. Deyarli har kuni. Biz esa ulardan (yig‘im) olmaymiz”, dedi u.
Deputatning so‘zlariga ko‘ra, O‘zbekiston tomoni hatto Qirg‘izistonning bir bank ilovasidan foydalanmoqda, bu esa vatandoshlarimizga yig‘imni to‘lashda qulaylik yaratadi. Deputat vazirdan o‘zbek avtomobillari uchun xuddi shunday yig‘imlarni joriy etishni yoki qo‘shni davlat bilan qirg‘izistonliklar ularning hududida bu yig‘imni to‘lamasligi haqida kelishib olishni so‘radi.
Tashqi ishlar vaziri Jeenbek Kulubayev bu masala ilgari ko‘tarilmaganini aytib, vaziyatni o‘rganib chiqishga va’da berdi.
“Biz bu masalani teng huquqlilik asosida ko‘tarishimiz va hukumatlararo komissiya yig‘ilishida muhokama qilishimiz mumkin”, degan vazir.
Ma’lumot uchun, O‘zbekiston Vazirlar Mahkamasining 2018-yil 18-iyuldagi “Tonirovkali (qoraytirilgan) oynali avtotransport vositalaridan foydalanishni tartibga solish chora-tadbirlari to‘g‘risida”gi qaroriga ko‘ra, xorijiy davlatlarning tonirovkali (qoraytirilgan) oynali yengil avtotransport vositalarining O‘zbekiston hududiga vaqtincha kirishi va tranziti uchun davlat byudjetiga tushadigan 15 AQSH dollari miqdorida yig‘im undiriladi.
Qirg‘izistonda avtomobillarni tonirovka qilish uchun ruxsatnoma olish yig‘imi jismoniy shaxslar uchun yiliga 50 ming som (7,44 million so‘m), yuridik shaxslar uchun esa 70 ming som (10,4 million so‘m)ni tashkil etadi.
Izoh (0)