Qirg‘izistonda 2023-yil xalqaro jinoiy doiralarda “Kolya-qirg‘iz” nomi bilan tanilgan mahalliy kriminal avtoritet Qamchi Ko‘lboyev hibsga olinishi chog‘ida o‘ldirilgandi. Qirg‘izistonda Milliy xavfsizlik qo‘mitasi raisi Qamchibek Tashiyev u “davlat manfaati uchun” yo‘q qilinganini aytdi va Salimboyvachcha borasida ham gapirdi.
Tashiyevga ko‘ra, Qirg‘izistonda uyushgan jinoyatchilik darajasi shunchalik yuqori bo‘lganki, jinoyat olami vakillari “butun mamlakat bo‘ylab hokimiyatni egallab, davlatnikiga o‘xshash boshqaruv tizimini yaratgan”.
Ularda prezident — qonundagi o‘g‘ri va nazoratchilar bor edi. Viloyat, tuman va shaharlarda ular tadbirkorlardan pul undirardi. Bu kuchli tuzilma edi. Men qonundagi o‘g‘rini yo‘q qilish to‘g‘risida qaror qabul qilishga majbur bo‘ldim. Tushunasizmi, davlat manfaati uchun. Biz uni, keyinchalik esa uning sheriklari hamda uyushgan jinoiy guruhning (UJG) boshqa a’zolarini yo‘q qildik, dedi u.
Tashiyevning ta’kidlashicha, bugungi kunda mamlakat UJGlardan xoli, jinoyat olamida esa “hech narsa qolmagan”. U maxsus xizmat ulardan milliardlab dollarni “tortib olganini” qayd etdi.
(Qirg‘iziston) Markaziy Osiyoda, hatto sobiq sovet davlatlari orasida ham UJG mavjud bo‘lmagan yagona davlatdir. Hozir tadbirkorlar ilgarigidek hech kimga to‘lov qilmayapti. Ularni yo‘q qilganimizdan so‘ng dastlabki paytlarda tadbirkorlar hatto kimga to‘lash kerakligini qidirib yurardi. Hatto bizning oldimizga ham kelardi, dedi MXQ raisi.
Salimboy haqida
Biroq Tashiyev Qirg‘izistonda ta’sir doiraga ega bo‘lgan boshqa mamlakatlarning jinoiy olam yetakchilari ham bo‘lganini aytdi. Gap Salim Abdivaliyev haqida bormoqda.
O‘zbekistondagi Salimboyvachcha mamlakatimizning janubini to‘liq nazorat qilardi. Janubda barcha UJG yetakchilari, yirik tadbirkorlar, hatto siyosatchilar va parlament deputatlari ham uning oldiga borardi. U aytgan hamma narsani bajarishardi, dedi xavfsizlik qo‘mitasi raisi.
Tashiyev endi mamlakat “o‘z yo‘lida” rivojlanishiga ishonch bildirdi.
Qamchi Ko‘lboyev o‘ldirilishi
Qamchi Ko‘lboyev 2023-yil 4-oktyabr kuni uni hibsga olish bo‘yicha maxsus operatsiya vaqtida militsiya xodimlari tomonidan o‘ldirildi. U maxsus operatsiya vaqtida “o‘qotar quroldan foydalangan holda qurolli qarshilik ko‘rsatgan” va javob o‘qidan halok bo‘lgan.
O‘limdan so‘ng, Milliy xavfsizlik davlat qo‘mitasi kriminalistlar vakillarini faol ravishda hibsga ola boshladi. Ko‘lboyevning 40 dan ortiq faol a’zolari va rahbarlari qo‘lga olindi. Ular orasida ayrim tadbirkorlar ham bor edi.
Shuningdek, Ko‘lboyevning noqonuniy yo‘l bilan qo‘lga kiritgan barcha aktivlari xatlandi, ularning umumiy qiymati taxminan 1 milliard dollarni tashkil etdi.
Salimboydan Qirg‘iziston prezidenti va Tashiyevni o‘ldirishda yordam so‘ralgan
2024-yil prezident Sadir Japarov sobiq deputat Emil Jamg‘irchiyev 2022-yilning dekabr oyida noqonuniy tarzda O‘zbekistonga o‘tib, Toshkentga kelib, Salim Abduvaliyevdan yordam so‘raganini aytdi.
U Salimboy laqabli kriminal avtoritet Salim Abduvaliyev bilan uchrashib, “ikki do‘st”ni yo‘q qilishga yordam berishni so‘ragan. Tegishli fakt bo‘yicha tergovni Milliy xavfsizlik davlat qo‘mitasi xodimlari O‘zbekiston maxsus xizmatlari bilan birgalikda olib borgan. Natija qanday bo‘lishi meni xavotirlantirmagandi, degan Qirg‘iziston prezidenti.
“Kaktus.media” nashrining ta’kidlashicha, qirg‘izistonliklar mamlakat prezidenti Sadir Japarov va Milliy xavfsizlik davlat qo‘mitasi rahbari Qamchibek Tashiyevni “ikki do‘st” deb atashadi.
Salim Abduvaliyev haqida
Salimboy nomi bilan tanilgan Salim Abduvaliyev 1950-yilda Toshkent shahrida tug‘ilgan, ma’lumoti oliy, jamoatchilik asosida Milliy olimpiya qo‘mitasi raisi o‘rinbosari va O‘zbekiston sport kurashlari assosiatsiyasi raisi lavozimlarida ishlagan.
U 2023-yilning dekabrida Toshkent shahrida o‘tkazilgan tezkor-profilaktik tadbir davomida qo‘lga olingandi. Salim Abduvaliyev Jinoyat kodeksining 248-moddasi 1-qismi (o‘qotar qurolni qonunga xilof ravishda saqlash) bilan gumon qilinuvchi tarzida jalb etilib, protsessual tartibda ushlangan.
2024-yil 19-mart kuni jinoyat ishlari bo‘yicha Mirobod tuman sudida Salim Abduvaliyevga oid jinoyat ishini ko‘rib chiqish bo‘yicha sud jarayoni yakunlanib, sud hukmi e’lon qilindi.
Unga muvofiq Salim Abduvaliyev Jinoyat kodeksining 246-moddasi (kontrabanda) 1-qismi bilan jinoiy javobgarlikka tortish muddati o‘tib ketgani sababli jinoiy javobgarlikdan ozod etilib, jinoyat ishining shu qismi Jinoyat-protsessual kodeksining 84-moddasi (ayblilik to‘g‘risidagi masalani hal qilmay turib jinoyat ishini tugatish uchun asoslar) 1-qismi 1-bandiga asosan tugatildi.
Salim Abduvaliyev Jinoyat kodeksining 248-moddasi (o‘qotar qurolning, o‘q-dorilarning, o‘qotar qurol asosiy qismlarining, portlovchi moddalarning, portlatish vositalarining yoki portlatish qurilmalarining qonunga xilof muomalasi) 2-qismida nazarda tutilgan jinoyatni sodir qilganlikda aybdor deb topilib, unga 6 yil muddatga ozodlikdan mahrum qilish jazosi tayinlandi. Tayinlangan jazoni umumiy tartibli koloniyada o‘tash belgilandi.
Izoh (0)