Номаълум миллиардер Атлантика океанидаги “Титаник” кемаси чўккан жойга тушиш учун 10 миллион доллар тўламоқчи. У 2023 йилда “Титан” батискафи билан содир бўлган фожиадан кейин буни амалга оширадиган биринчи одам бўлади. Бу ҳақда New York Post хабар берди.
Экспедиция тафсилотлари сир сақланмоқда, бироқ тадқиқотчилар буни ўзаро муҳокама қилмоқда. Манбага кўра, сафар бир неча ҳафтадан кейин бўлиб ўтади. “Сиз унинг исмини, албатта, биласиз”, дейди суҳбатдош.
2023 йил 18 июнда “Титаник” кемаси қолдиқларига тушмоқчи бўлган “Титан” батискафи бедарак йўқолганди. Қурилма сувга тушгандан икки соат ўтмай алоқа узилиб қолган. Тўрт кундан сўнг қутқарувчилар унинг бўлакларини топган: батискаф ичкарига йўналтирилган портлаш оқибатида бутунлай вайрон бўлган. Унинг қисмлари ва экипаж аъзоларига тегишли деб тахмин қилинган қолдиқлар кейинчалик юзага чиқарилди.
Батискаф Oceangate Expeditions компаниясига тегишли бўлиб, унда беш киши бўлганди: компания асосчиси Стоктон Раш, франциялик чуқур сувости тадқиқотлари фахрийси Пол-Анри Наржеоле, британиялик миллиардер ва космик сайёҳ Ҳамиш Ҳардинг, шунингдек, покистонлик тадбиркор Шаҳзод Довуд ва унинг ўғли Сулаймон.
2024 йил сентябрь ойида АҚШда ҳалокат бўйича суд муҳокамалари ўтказилган. Терговнинг дастлабки кунларидаёқ Шимолий Атлантикадаги фожиа ҳақида кутилмаган тафсилотлар маълум бўлган. Қирғоқ қўриқлаш хизмати маълумотларига кўра, 2021 йилда аппаратда 70 та, 2022 йилда эса яна 48 та бартараф этилиши керак бўлган носозлик қайд этилган.
OceanГатеънинг собиқ техник директори Тони Ниссеннинг айтишича, Стоктон Раш билан ишлаш жуда қийин бўлган. Чунки у лойиҳани амалга ошириш муддатларини тезлаштирган, молиялаштиришни қисқартиришга уринган, доимий равишда турли вазифаларга ўзгартиришлар киритиб турган.
Суд тингловларида, шунингдек, 2018 йилда батискаф синовлари вақтида қурилмага чақмоқ уриб, унинг корпусига зарар етказгани, бу эса орадан бир неча йил ўтиб фожиа келиб чиқишига сабаб бўлгани таъкидланган.
Изоҳ (0)