Rossiya 2025-yilda armiya bilan shartnoma tuzgan kamida 902 nafar O‘zbekiston fuqarosini urushga yolladi. Ular orasida 19 yoshli fuqarolar ham bor. Bu haqda manbalarga tayanib “Xochu jit” (“Yashashni xohlayman”) loyihasi xabar berdi.
Ma’lum qilinishicha, o‘zbekistonliklarni yollash uchun Rossiya avvalgidek usullardan foydalanmoqda. Jumladan, mehnat muhojiri sifatida kelgan O‘zbekiston fuqarolari yuqori maoshli ish bahonasida qurilishlarga yoki armiyaning frontorti bo‘linmalariga yollanadi. Asosiy rag‘bat sifatida ularga Rossiya fuqaroligi va’da qilinadi.
Rossiya qamoqxonalarida jazo muddatini o‘tayotganlar tahdid va ruhiy bosim orqali urushga jalb qilinmoqda, deydi “Xochu jit” loyihasi.
Yollash ko‘pincha shantaj bilan birga kechishi mumkin. Bu asosan Rossiya fuqaroligini yaqinda olgan muhojirlarga nisbatan keng qo‘llanadi. Rossiya Tergov qo‘mitasi raisi Aleksandr Bastrikin 5 mingdan ortiq reyd o‘tkazilgani, ular davomida 90 ming kishi “ushlanganini” aytgandi. Ularning 30 ming nafari shartnoma imzolab, urushga jo‘natilgan.
O‘zbekiston fuqarolari Ukrainadagi urushga avval ham yuborilgan
Aprel oyida “Xochu jit” loyihasi Rossiya armiyasi bilan shartnoma tuzib, Ukrainaga qarshi urushda qatnashgan 1100 kishi haqidagi ma’lumotlarni oshkor qilgan edi. O‘shanda ro‘yxat to‘liq emasligi, agar Rossiya armiyasi safida jang qilayotgan etnik o‘zbeklar hisobga olinsa, ularning soni bir necha ming kishiga yetishi ta’kidlangan.
Urushga yollangan fuqarolarning katta qismini 25 dan 50 yoshgacha bo‘lganlar tashkil etgan. “Xochu jit” 1100 kishiga oid ma’lumotlarni qanday qo‘lga kiritganini ochiqlamagan.
O‘zbekiston Tashqi ishlar vazirligi munosabati
O‘zbekiston rasmiylari Ukrainaga qarshi urushda Rossiya armiyasiga yollangani aytilayotgan o‘zbekistonliklar ro‘yxati bo‘yicha tekshiruv olib bormoqda. Tashqi ishlar vazirligi matbuot kotibi Ahror Burhonov bu ma’lumotlar vakolatli organlar tomonidan tekshirilayotganini aytgan.
U O‘zbekiston fuqarolarining xorijiy harbiy harakatlarda ishtirok etishi taqiqlanganini ta’kidlab, ma’lumotlar tasdiqlansa, tegishli choralar ko‘rilishini bildirgandi. Biroq, mazkur bayonotdan keyin O‘zbekiston fuqarolarining urushga yollangani ehtimoli bo‘yicha hech qanday ma’lumot berilmagan.
O‘zbekiston fuqarolariga chet davlatlarining harbiy xizmatiga yollanish taqiqlangan
O‘zbekiston Jinoyat kodeksining 154-moddasiga ko‘ra, harbiy harakatlarda qatnashish uchun yollanish 10 yilgacha ozodlikdan mahrum etishga sabab bo‘ladi. Urushga odamlarni yollash, ularni o‘qitish va ulardan harbiy harakatlarda foydalanish 12 yilgacha ozodlikdan mahrum qilishga olib keladi.
Jinoyat kodeksining 154-1-moddasiga asosan, chet davlatlar harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga yollangan O‘zbekiston fuqarolari 5 yilgacha ozodlikdan mahrum qilinadi.
Izoh (0)