Prezidentning tegishli qaroriga ko‘ra, Alisher Boboyev sog‘liqni saqlash vazirining birinchi o‘rinbosari etib tayinlandi. Bu haqda vazirlik matbuot xizmati xabar berdi.
U tayinlovga qadar 2023-yilning oktyabridan buyon Qashqadaryo viloyati sog‘liqni saqlash boshqarmasi boshlig‘i sifatida faoliyat yuritib kelayotgan edi.
2024-yilning yanvarida sog‘liqni saqlash vazirining birinchi o‘rinbosari Alisher Shodmonov uzoq muddatli davolanish uchun mehnat ta’tiliga chiqishi munosabati bilan uning vazifasini vaqtinchalik bajarish Prezident administratsiyasi Ijtimoiy rivojlanish departamenti sog‘liqni saqlashni rivojlantirish sho‘basi mudiri Davron Sultanov zimmasiga yuklatilgandi.
Alisher Boboyev 1996-yilda Toshkent davlat tibbiyot institutini tamomlab, ushbu oliy o‘quv yurtining klinik ordinatura yo‘nalishida tahsil olgan. Mehnat faoliyatini 1998-yilda Toshkent davlat tibbiyot institutida katta laborant sifatida boshlagan.
Turli yillarda Toshkent farmatsevtika instituti tibbiy biologik fanlar kafedrasi katta laboranti, Toshkent shahar Olmazor tumani ko‘p tarmoqli markaziy poliklinikasi, 1-sonli Respublika klinik shifoxonasi maslahat-diagnostika poliklinikasi hamda Respublika klinik shifoxonasi urologiya bo‘limi singari qator muassasalarda shifokor-urolog, Sog‘liqni saqlash vazirligi kotibiyatida bosh mutaxassis kabi lavozimlarda ishlagan. II darajali “Salomatlik” ordeni bilan taqdirlangan.
Izoh (0)