Isroil G‘azo shahrida keng ko‘lamli harbiy hujumga tayyorlanayotgan bir vaqtda, mamlakat mudofaa vaziri Isroil Kats 22-avgust kuni falastinlik HAMAS guruhini jiddiy ogohlantirdi. Uning aytishicha, guruh yahudiy davlatining shartlariga rozi bo‘lmasa, G‘azoning eng yirik shahri butkul vayron qilinadi. Bu haqda Al Arabiya xabar berdi.
Katsning ta’kidlashicha, G‘azo shahri Rafah kabi butunlay xarobaga aylantiriladi. Vazirning ushbu bayonoti mamlakat bosh vaziri Benyamin Netanyaxu armiyaga shaharni to‘liq egallashni buyurganidan bir kun o‘tib yangramoqda.
“G‘azo shahri Rafah va Bayt Hanun kabi xarobazorga aylanishi mumkin. HAMASning sektordagi qotil va zo‘ravonlari uchun do‘zax darvozalari ochiladi — to ular urushni tugatish bo‘yicha Isroil shartlariga rozi bo‘lmaguncha”, deb yozdi Kats o‘zining ijtimoiy tarmoqdagi sahifasida.
Isroil anklavdagi urushni to‘xtatish uchun 2 ta asosiy talabni ilgari surmoqda: barcha garovga olinganlarni ozod qilish va HAMASning to‘liq qurolsizlantirilishi. HAMAS esa garovdagilarni ozod qilishga rozi, biroq qurolsizlanishni faqat Falastin davlati tuzilgandagina muhokama qilish mumkinligini ta’kidlamoqda.
Ma’lumot o‘rnida, sektorda 22-avgust tongidan beri 25 nafar falastinlik halok bo‘lgan, ular orasida 3 nafar yosh bola ham bor. Xususan, Isroilning G‘azo shahridagi Shayx Radvan mahallasida joylashgan maktab binosiga uyushtirgan havo hujumi oqibatida 5 kishi halok bo‘lib, bir kishi yaralangan.
Izoh (0)