Ijtimoiy tarmoqlarda ayrim konsalting firmalarning 3-4 kursdan o‘qishga kiritishga va’da berayotgani haqida ochiq e’lonlari paydo bo‘ldi. Ushbu xabarlarga Oliy ta’lim, fan va innovatsiyalar vazirligi munosabat bildirdi.
Vazirlik matbuot xizmatining yozishicha, HEMIS tizimi orqali har bir talabaning qabul qilinishi, o‘qiyotgan yo‘nalishi va kursi aniq qayd etiladi. Xorijdan o‘qishini ko‘chirishda esa faqat rasmiy hujjatlar asosida, o‘quv rejalari solishtirilib, rektor buyrug‘i bilan qabul amalga oshiriladi. Bu jarayon elektron tizimda to‘liq va shaffof yuritiladi, asossiz ma’lumotlar kiritilmaydi.
Munosabatda aytilishicha, holat yuzasidan tekshiruv olib boriladi.
“Oliy ta’lim, fan va innovatsiyalar vazirligi mazkur masala yuzasidan tekshiruv olib bormoqda. Agar qonunbuzarlik holatlari aniqlansa, belgilangan tartibda huquqiy baho berilib, jamoatchilikka rasmiy axborot taqdim etiladi”, deyiladi vazirlik bayonotida.
Bloger Xushnudbek Xudoyberdiyevning ta’kidlashicha, ayrim konsalting firmalar 50 dan ortiq yo‘nalishga 2-3-4 va hatto 5-kursdan o‘qishni taklif qiladi. Buning uchun Rossiya, Tojikiston, Qirg‘iziston, Qozog‘iston kabi davlatlarning oliygohlarida o‘qiyapti, degan soxta hujjat tayyorlanadi. Lekin ular bu hujjatni talabaga ko‘rsatishmaydi. Bu soxta hujjat orqali talaba o‘qishini chet elda ko‘chirib kelganday qilib ko‘rsatishadi va u O‘zbekistonda o‘qishni yuqori kursdan boshlaydi.
Konsalting firmalar ushbu xizmatlari uchun 10 milliondan 30 million so‘mgacha mablag‘ talab qilishadi. Lekin bu pullar kontrakt summasini o‘z ichiga olmaydi. Kontrakt pulini talaba alohida to‘lashi kerak bo‘ladi.
Universitetlar esa, HEMIS dasturiga orqa sana buyrug‘i bilan yangi kelgan talabalarni kiritib qo‘yadi. Buning uchun kontrakt summasi to‘liq to‘lanishi kerak.
“25-yil 1-yanvardan 3-iyulgacha 41 ming 812 nafar talaba HEMIS tizimiga kiritilgan, shundan 25 ming 821 nafari sirtqi ta’limga qo‘shilgan. Shu davr ichida bitta xususiy universitet 3 va 4-kursga 3 ming 200 nafar talaba qabul qilgan, yana boshqa bittasi 1 ming 599 kishini yuqori kurslarga HEMIS’ga kiritgan”, deb yozadi Xushnudbek Xudoyberdiyev.
Izoh (0)