Давлат хавфсизлик хизмати Ўзбекистонга Россия, Тожикистон ва Афғонистондан олиб келинган қарийб 80 килограмм гиёҳвандлик воситалари ноқонуний айланмасига чек қўйилганини маълум қилди.
Давлат хавфсизлик хизматининг Чегара қўшинлари ва Сурхондарё вилояти бўйича бошқармаси ҳамда вилоят ички ишлар бошқармаси ходимлари ҳамкорлигида Узун туманида ўтказилган тезкор тадбирда, 2005 ва 2006 йилларда туғилган икки нафар маҳаллий фуқаро 20 кило 374 грамм опий ва 41 кг 668 грамм гашиш гиёҳвандлик воситаларини Тожикистондан контрабанда йўли билан олиб келган вақтида ушланган.
Шундан сўнг тезкор тадбир давом эттирилиб, уларнинг жиноий шериги бўлган, Узун туманида яшовчи, 2004 йилда туғилган шахс ҳамда гиёҳвандлик воситаси бюртмачиси ҳисобланган, Денов туманида истиқомат қилувчи, 2000 йилда туғилган фуқаро ҳам процессуал тартибда ушланган.
Чегара қўшинлари ҳарбий хизматчилари ва ДХХ Тошкент вилояти бўйича бошқармаси ҳамда вилоят божхона бошқармаси ходимлари ҳамкорлигида ўтказилган тезкор тадбирда эса, Қозоғистондан халқаро ўтказиш пункти орқали мамлакатга кириб келган Фарғона вилоятининг Тошлоқ туманида яшовчи, 1991 йилда туғилган шахсга тегишли юклар ўрнатилган тартибда текширилганда мармар қуйма тош ичига яширилган 7 кило 902 грамм “Мефедрон” синтетик гиёҳвандлик воситаси борлиги маълум бўлган.
Терговга қадар текширув давомида, наркокурер моддий манфаатдорлик эвазига ушбу гиёҳвандлик воситасини Россиянинг Москва шаҳрида номаълум шахс томонидан Telegram бот орқали кўрсатилган манзилдан олиб, Ўзбекистондаги буюртмачига етказиб бериши кераклиги аниқланган. Сўнгра тезкор тадбир давом эттирилиб, Бекобод туманида истиқомат қилувчи, 1985 йилда туғилган фуқаро Ўрта Чирчиқ туманида гиёҳвандлик воситасини қабул қилиб олган вақтида ушланган.
Давлат хафсизлик хизматининг Фарғона ва Сурхондарё вилоятлари бўйича бошқармалари ходимлари томонидан амалга оширилган тезкор-қидирув тадбирлари натижасида афғонистонлик наркосавдогарлардан гиёҳвандлик воситаларини олиб, Фарғона вилоятида сотиш билан шуғулланган шахслар фаолиятига чек қўйилди.
Хусусан, Қўқон шаҳрида яшовчи, 1964 йилда туғилган аёл ва унинг 1993 йилда туғилган, муқаддам гиёҳвандлик воситалари савдоси билан боғлиқ жинояти учун судланган ўғли қўлга олиниб, улардан Афғонистондан контрабанда йўли билан келтирилган 5 кило 878 грамм опий ва 3 кило 922 грамм гашиш моддалари ашёвий далил сифатида олинган.
Ўтказилган тезкор тадбирлар давомида хориждан олиб келинган жами 79 кило 744 грамм гиёҳвандлик воситаларининг ноқонуний айланмасига чек қўйилган.
Ҳозирда мазкур шахсларнинг барчасига нисбатан Жиноят кодексининг 246 (контрабанда) ва 273-моддалари (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят ишлари қўзғатилиб, қамоқ эҳтиёт чораси қўлланилди. Тергов ҳаракатлари олиб борилмоқда.
Изоҳ (0)