Toshkent shahar Yakkasaroy tumanida inspektor 9-qavatdan o‘zini tashlab, joniga qasd qilmoqchi bo‘lgan qizni qutqardi. Bu haqda poytaxt IIBB xabar berdi.
Maʼlum qilinishicha, voyaga yetmagan qiz ko‘p qavatli uylardan birining tomi orqali ustunga turib, o‘zini pasga tashlamoqchi bo‘lgan. Bu holatga guvoh bo‘lgan fuqarolardan biri ichki ishlarga xabar bergan.
Profilaktika inspektori kelib, 9-qavatdagi boshqa xonadonlarning balkon qismi orqali qizning yoniga kelgan va hayotini saqlab qolgan.
“15 yoshli qiz o‘z joniga qasd qilish maqsadida binoning 9-qavatiga chiqib olgan ekan. Qo‘shni xonadondan uy balkoniga o‘tib, qizning yoniga yaqinlashdim. Qizimiz juda ham agressiv va stress holatida bo‘lgani sababli profilaktik suhbatlar olib, yetib borish uchun 25-30 daqiqa ketdi.
Voyaga yetmagan qizimizni 10-15 daqiqa bor kuchim bilan ushlab turish mobaynida qiz menga juda qarshilik ko‘rsatdi. Lekin men o‘zimni qo‘lga olgan holatda mahkam ushlab turdim”, deydi u.
Inspektor yana bir xodimdan arqon so‘ragan, xodim arqon topa olmagani sababli bel qismidagi kamarni yechib bergan.
Toshkentda cho‘kayotgan qizlarni qutqarib, halok bo‘lgan Abdumannop Samiqov “Jasorat” medali bilan mukofotlangani haqida xabar berilgandi. Poytaxt hokimligi mukofotni topshirish marosimida marhumning turmush o‘rtog‘iga 50 mln so‘m berilganini ma’lum qilgan.
Shuningdek, Qashqadaryoda joniga qasd qilish uchun o‘zini kanalga tashlagan fuqaroni ichki ishlar xodimi qutqardi.
Izoh (0)