Жорий йил I ярмида Ўзбекистонда 60 ва 70 ёшдан ўтиб ота бўлганлар сони қисқарди. Бу ҳақда Адлия вазирлиги тарқатган инфографикадан кўриш мумкин.
Никоҳ ва туғилишлар статистикаси
2025 йил январь июнь ойларида Ўзбекистонда 95 минг 270 та никоҳ қайд этилди. Шундан 30 ёшгача тузилган никоҳлар 76 минг 324 та, 50 ёшдан ўтиб қурилган оилалар 669 та бўлган.
Биринчи марта фарзандли бўлган аёлларнинг ўртача ёш кўрсаткичи 23 ёшни ташкил этган. Ўтган даврда она бўлганлардан 3 минг 178 нафари 40 ёшдан ошган, 42 нафари 45 ёшдан ўтган, 8 нафари 50 ёшдан кейин фарзанд кўрган.
Олти ой давомида мамлакатда жами 10 минг 317 нафар эгизак туғилган. Уларнинг энг кўпи Самарқанд вилоятида (1 минг 253 нафар), энг кам кўрсаткич эса Навоий вилоятида (262 нафар).
Ҳудудлар бўйича энг кўп туғилиш Самарқанд (48 минг 769 та), Фарғона (45 минг 508 та) ва Қашқадарё (44 минг 257 та) вилоятларида қайд этилган. Энг кам кўрсаткич эса Жиззах (17 минг 708 та), Навоий (11 минг 434 та) ҳамда Сирдарё (10 минг 23 та) вилоятларида кузатилган.
Кексайганда ота бўлганлар
Мамлакатда олти ой давомида 60 ёшдан катта бўлган 257 нафар фуқаро биринчи марта ота бўлган. Бу ўтган йил мос давридагидан 155 нафарга кам.
2025 йил январь июнь ойларида 70 ёшдан катта 17 нафар отахон илк бор фарзанд кўрган. Таққослаш учун, 2024 йил I ярмида бундай бобо–оталар сони 34 нафарни ташкил этган.
Ярим йил ичида ёши 50 дан ўтиб ота бўлганлар сони 1 минг 394 кишига етди. Ўтган йилнинг илк олти ойида бу кўрсаткич 2 минг 309 та эди.
Изоҳ (0)