O‘zbekistonda xotin-qizlarning bandligi va ijtimoiy faolligini ta’minlashga qaratilgan ijtimoiy loyihalarni moliyalashtirish uchun BHMning 60 baravarigacha miqdorda grant ajratiladi. Bu haqda hukumatning 26-iyuldan kuchga kirgan qarorida belgilandi.
1-avgustdan BHM 412 ming so‘mni tashkil etishi hisobga olinsa, bu grant miqdori 24 million 720 ming so‘mga teng bo‘ladi.
Qaror ko‘ra, ushbu ijtimoiy yordamni jismoniy shaxslar va nodavlat tashkilotlar bir yilda bir marta olishi mumkin:
- jismoniy shaxslarga ijtimoiy loyihalarni amalga oshirish uchun zarur asbob-uskuna, jihozlar, xomashyo yoki xizmatlar xarid qilib berish orqali ajratiladi;
- nodavlat tashkilotlarga ish o‘rinlarini yaratish, ishlab chiqarish (xizmatlar ko‘rsatish) ko‘lamini kengaytirish, xomashyo xarid qilish, loyiha doirasida ishga qabul qilingan shaxslarning bilimi va malakasini oshirish maqsadida o‘qitish xarajatlarini qoplash uchun ularning tijorat banklaridagi hisobvaraqlariga shartnomaga muvofiq o‘tkazib beriladi.
Ijtimoiy yordam tuman (shahar) hokimining o‘rinbosari — tuman (shahar) oila va xotin-qizlar bo‘limi boshlig‘i rahbarligidagi komissiya tomonidan har yili o‘tkaziladigan “Eng yaxshi ijtimoiy loyihalar” tanlovida g‘olib deb topilgan loyihalarni moliyalashtirish uchun ajratiladi.
Har bir mahallada jismoniy yoki yuridik shaxslar tomonidan amalga oshirish rejalashtirilgan ijtimoiy loyihalar har yili yanvar oyi yakuniga qadar ushbu mahallada faoliyat yurituvchi xotin-qizlar faoliga taqdim etiladi. Loyihalar “mahalla yettiligi” tomonidan har yili 20-fevralgacha ko‘rib chiqiladi va eng yaxshi deb topilgan 3 ta loyiha tuman (shahar) oila va xotin-qizlar bo‘limi boshlig‘i rahbarligidagi komissiyaga ko‘rib chiqish uchun kiritiladi.
Komissiya tomonidan har yili 8-martga qadar loyihalar orasidan mahallalar kesimida har bir mahallada yashovchi Kambag‘al oilalar reyestriga kiritilgan oilalarning kamida 3 nafar xotin-qizlarning bandligini ta’minlashga qaratilgan bitta loyiha g‘olib deb topiladi.
Ijtimoiy loyihalarni amalga oshirish natijasida birinchi navbatda quyidagi toifaga kiruvchi xotin-qizlar bandligini ta’minlash talab etiladi:
- ishsiz, ayniqsa qishloq joylarda bola tarbiyasi bilan shug‘ullanayotgan;
- mehnat migratsiyasidan qaytib kelgan;
- nogironligi bo‘lgan mehnatga layoqatli ishsiz xotin-qizlar;
- kunlik mehnat faoliyati bilan shug‘ullanib, daromad topayotgan;
- odam savdosi hamda tazyiq va zo‘ravonlikdan jabr ko‘rgan, og‘ir iqtisodiy ahvolga tushib qolgan;
- OTMda o‘qish imkoniyati bo‘lmagan;
- muqaddam jinoiy javobgarlikka tortilgan, profilaktik ro‘yxatga olingan, jazoni ijro etish muassasalaridan qaytib kelgan xotin-qizlar.
Hukumat qarorida kambag‘al oila a’zosi bo‘lgan xotin-qizlarga uy-joy ta’miri uchun 20,6 million so‘mgacha pul ajratilishi ham belgilandi.
Izoh (0)