Ўзбекистонда хотин-қизларнинг бандлиги ва ижтимоий фаоллигини таъминлашга қаратилган ижтимоий лойиҳаларни молиялаштириш учун БҲМнинг 60 бараваригача миқдорда грант ажратилади. Бу ҳақда ҳукуматнинг 26 июлдан кучга кирган қарорида белгиланди.
1 августдан БҲМ 412 минг сўмни ташкил этиши ҳисобга олинса, бу грант миқдори 24 миллион 720 минг сўмга тенг бўлади.
Қарор кўра, ушбу ижтимоий ёрдамни жисмоний шахслар ва нодавлат ташкилотлар бир йилда бир марта олиши мумкин:
- жисмоний шахсларга ижтимоий лойиҳаларни амалга ошириш учун зарур асбоб-ускуна, жиҳозлар, хом ашё ёки хизматлар харид қилиб бериш орқали ажратилади;
- нодавлат ташкилотларга иш ўринларини яратиш, ишлаб чиқариш (хизматлар кўрсатиш) кўламини кенгайтириш, хом ашё харид қилиш, лойиҳа доирасида ишга қабул қилинган шахсларнинг билими ва малакасини ошириш мақсадида ўқитиш харажатларини қоплаш учун уларнинг тижорат банкларидаги ҳисобварақларига шартномага мувофиқ ўтказиб берилади.
Ижтимоий ёрдам туман (шаҳар) ҳокимининг ўринбосари — туман (шаҳар) оила ва хотин-қизлар бўлими бошлиғи раҳбарлигидаги комиссия томонидан ҳар йили ўтказиладиган “Энг яхши ижтимоий лойиҳалар” танловида ғолиб деб топилган лойиҳаларни молиялаштириш учун ажратилади.
Ҳар бир маҳаллада жисмоний ёки юридик шахслар томонидан амалга ошириш режалаштирилган ижтимоий лойиҳалар ҳар йили январь ойи якунига қадар ушбу маҳаллада фаолият юритувчи хотин-қизлар фаолига тақдим этилади. Лойиҳалар “маҳалла еттилиги” томонидан ҳар йили 20 февралгача кўриб чиқилади ва энг яхши деб топилган 3 та лойиҳа туман (шаҳар) оила ва хотин-қизлар бўлими бошлиғи раҳбарлигидаги комиссияга кўриб чиқиш учун киритилади.
Комиссия томонидан ҳар йили 8 мартга қадар лойиҳалар орасидан маҳаллалар кесимида ҳар бир маҳаллада яшовчи Камбағал оилалар реестрига киритилган оилаларнинг камида 3 нафар хотин-қизларнинг бандлигини таъминлашга қаратилган битта лойиҳа ғолиб деб топилади.
Ижтимоий лойиҳаларни амалга ошириш натижасида биринчи навбатда қуйидаги тоифага кирувчи хотин-қизлар бандлигини таъминлаш талаб этилади:
- ишсиз, айниқса қишлоқ жойларда бола тарбияси билан шуғулланаётган;
- меҳнат миграциясидан қайтиб келган;
- ногиронлиги бўлган меҳнатга лаёқатли ишсиз хотин-қизлар;
- кунлик меҳнат фаолияти билан шуғулланиб, даромад топаётган;
- одам савдоси ҳамда тазйиқ ва зўравонликдан жабр кўрган, оғир иқтисодий аҳволга тушиб қолган;
- ОТМда ўқиш имконияти бўлмаган;
- муқаддам жиноий жавобгарликка тортилган, профилактик рўйхатга олинган, жазони ижро этиш муассасаларидан қайтиб келган хотин-қизлар.
Ҳукумат қарорида камбағал оила аъзоси бўлган хотин-қизларга уй-жой таъмири учун 20,6 миллион сўмгача пул ажратилиши ҳам белгиланди.
Изоҳ (0)