“Kalmar o‘yini”ning uchinchi mavsumi tomoshabinlarni o‘ziga rom etdi, muxlislar final va qahramonlar haqida haligacha qizg‘in bahslashmoqda. Serialdagi mayda-chuyda detallar ham ziyrak tomoshabinlar e’tiboridan chetda qolmadi.
Ovqat bilan manipulyatsiya qilish
Tashkilotchilarning o‘yinchilar e’tibor bermaydigan yana bir vositasi — ovqatlanishdir. Undan o‘yinchilarning kayfiyatini boshqarish va nazorat qilish uchun foydalaniladi. Boshida to‘yimli taomlar beriladi. Birinchi mavsumda ratsion suv bilan tuxumgacha, uchinchi mavsumda esa qaynatilgan kartoshkagacha qisqartiriladi. Bu ochlik asabiylashish va holsizlikni keltirib chiqaradi, shuningdek, o‘yinchilarning diqqatini pasaytiradi.
333 raqamli o‘yinchining taqdiriga ishora
Serialdagi yozuvlar nafaqat falsafiy yoki o‘yinchilar uchun ko‘rsatma vazifasini bajargan, balki tomoshabinga qahramonlarning asl mohiyatini tushunishga ham yordam bergan. Masalan, “Bekinmachoq” o‘yini paytida o‘yinchi Li Mengi (333-raqamli o‘yinchi) orqasida ikkita yozuv paydo bo‘ladi. Bir sahnada uning orqasida koreyscha ibora ko‘rinadi: 사람 조심 바보. So‘zma-so‘z tarjimasi: “Ehtiyot bo‘ling, odamlar ahmoqlardir”. Boshqa kadrda esa yana bir jumla: “Sevgidan ehtiyot bo‘ling”. Keyinchalik o‘yinchi ham sevgilisiga, ham boshqa ishtirokchilarga xiyonat qiladi, ammo finalda o‘zi halok bo‘ladi.
Taymerdagi raqamlar
“Bekinmachoq” o‘yinida Ki Xun Kan Dehoni (388-raqamli o‘yinchi) qidiradi, chunki aynan u sababli ikkinchi mavsumda qochish rejasi barbod bo‘lgandi. Xoinni tutish uchun Ki Xunning 30 daqiqasi bor, ammo u o‘yin tugashiga atigi 4 daqiqa-yu 56 soniya qolganda uning iziga tushadi. Bu bosh qahramonning tartib raqami — 456 ga to‘g‘ridan-to‘g‘ri ishora qiladi.
Birinchi mavsumda ishtirok etgan o‘yinchiga ishora
Uch mavsum davomida o‘yinda turli mamlakatlardan kelgan o‘yinchilar ishtirok etadi. Shunday ishtirokchilardan biri 067-raqamli o‘yinchi sifatida tanilgan Kan Se Bek edi. Qo‘riqchi Kan No Il ham xuddi u kabi Shimoliy Koreyadan. Ikki qahramonning bir-biriga bog‘liqligini nafaqat tug‘ilgan joyi, balki ishtirokchi ayolning ismi “daryo tongi”, qo‘riqchi ayolning ismi esa “daryo tuni” deb tarjima qilinishi ham ko‘rsatadi.
O‘yinchilarning qora ro‘yxati
Beshinchi epizodda Kan No Il bilan bog‘liq yana bir qiziqarli holat kuzatiladi. U arxivga qaytgach, u yerda “Kalmar o‘yini 2024 arxivlari” deb yozilgan bir nechta papkalarni va chap burchakda “O‘yinchilarning qora ro‘yxati” faylini topadi. Biroq u 246-raqamli o‘yinchi haqidagi ma’lumotlarni olib ketib, uni yo‘q qilishga qaror qiladi. Shu sababli tomoshabinlarga qora ro‘yxatda kimlar borligi va ular u yerga nima uchun kiritilgani haqida ma’lumot berilmaydi.
Rejissyorning epizodik roli
Serialning yakuniy qismida rejissyor Xvan Don Xekni ko‘rish mumkin. U ko‘cha rassomi rolini ijro etgan. To‘g‘ri, bu epizod juda qisqa va u orqa planda qolgani uchun uning yuzini aniq ko‘rish imkonsiz, biroq ziyrak tomoshabinlar rejissyorni darrov tanidi.
Niqobdagi kvadrat
Detektiv yordamchisi Chxve Vu Sok kapitan Parkning uyidan qo‘riqchilarning pushti rangdagi formasi va kvadrat shaklli niqobini topib oladi. Bu Parkning tashkilotchilar bilan aloqasini hamda uning yuqori mavqeyini isbotlaydi. Chunki o‘yin ortidagi xodimlar iyerarxiyasida aynan kvadrat egalari elitaga mansub hisoblanadi. Doira va uchburchak egalari esa tartibni nazorat qilib, asosiy vazifalarni bajaradi.
Ttakji o‘yini
Serialning oxirgi daqiqalarida boshlovchi 456-raqamli ishtirokchining narsalarini qiziga topshirib qaytayotganida, tor ko‘chadan tanish ovozlarni eshitib qoladi. Shunda u mashina oynasini tushiradi va Keyt Blanshett ijro etgan amerikalik yollovchi ayolning bir tilanchi bilan ttakji o‘ynayotganini ko‘radi. Ba’zilar buni original serialning Amerika spin-offiga ishora deb hisoblasa, boshqalar esa Ki Xun tizimni yenga olmaganiga dalil deb biladi, chunki bunday o‘yinlar har bir mamlakatda tarqalib bo‘lgandi.
Izoh (0)