AQSHning Tennessi shtatida 1994-yilda muzlatilgan embriondan sog‘lom chaqaloq tug‘ildi. Bu haqda MIT Technology Review nashri xabar berdi.
Chaqaloqning biologik embrioni 1990-yillarda Linda Archerd ismli ayol tomonidan EKO (sun’iy urug‘lantirish) orqali yaratilgan. Ayol o‘sha paytda olti yil davomida homilador bo‘la olmagan. 1994-yil may oyida shifokorlar to‘rtta embrion yaratishga muvaffaq bo‘lgan. Ulardan biri Linda bachadoniga ko‘chirilgan, shundan so‘ng ayol sog‘lom qiz farzand dunyoga keltirgan. Qolgan uchta embrion esa kriokonservatsiya qilingan, ya’ni muzlatilgan holda saqlangan.
Linda Archerd uchun bu yiliga 1000 dollarga tushgan. Dastlab ayol ularni o‘zi ishlatmoqchi bo‘lgan, biroq keyinchalik fikrini o‘zgartirib, boshqa oilalarga topshirishga qaror qilgan. Hozirda Linda 62 yoshda. Aksariyat klinikalar uning embrionlari bilan ishlashdan bosh tortgan, chunki ular eskirgan texnologiyalar bilan muzlatilgan bo‘lgan.
Natijada Ohayo shtatida yashovchi Lindsi va Tim Pirs ismli er-xotin ushbu embrionlardan birini Open Hearts dasturi orqali “asrab olgan”. Ular shu tariqa 2025-yil 26-iyul kuni o‘g‘il farzandli bo‘lgan. U “eng keksa chaqaloq” deb e’tirof etilgan.
Pirslar 7 yil davomida tabiiy yo‘l bilan farzand ko‘rishga uringan, ammo muvaffaqiyatga erisha olmagan.
Bizda og‘ir tug‘uruq bo‘ldi, lekin hozir hammasi yaxshi. U juda tinch, bebaho farzandimiz borligiga hali ham ishona olmayapmiz, deydi Lindsi.
Linda Archerd esa hozircha chaqaloq bilan uchrashmoqchi emasligini bildirgan. Biroq uning dunyoga kelishini “haqiqatga aylangan orzu” deb atagan.
Bu mening DNKimdan, bu mening qizimning tug‘ishgan ukasi, deya ta’kidlagan u.
Izoh (0)