“Yulduzlar jangi” filmidagi uchar motosikl real hayotda taqdim etildi (video)

Polshaning Volonaut kompaniyasi mashhur “Yulduzlar jangi” franshizasidagi transportga o‘xshash uchar motosiklni taqdim etdi. Mutaxassislar ta’kidlashicha, transport nafaqat vizual jihatdan filmdagi transportga o‘xshaydi, balki haqiqatan ham uchadi. Motosikl soatiga 200 kilometr tezlikka chiqishi mumkin.

Yangi loyiha haqida internetda tarqalgan videodan so‘ng ma’lum bo‘ldi. Unda bayk osmonga ko‘tarilib, parvoz qilgani aks etgan edi. Rolik internetda katta shov-shuvga sabab bo‘ldi, biroq ko‘plab foydalanuvchilar uni kompyuter grafikasi yoki sun’iy intellekt yordamida yaratilgan, deya shubhalandi. Volonaut kompaniyasi esa ushbu kadrlarning mutlaqo haqiqiyligini tasdiqladi.

Kompaniya asoschisi Tomas Patanning so‘zlariga ko‘ra, bayk reaktiv dvigatel va patentlangan stabilizator tizimi bilan jihozlangan. Bu tizim transportni oson boshqarish uchun yordam beradi.

“Bizning maqsadimiz shunchaki kelajak transportini yaratish emas edi. Biz jangari filmlar suratga olinadigan maydonchada ishlatish mumkin bo‘lgan to‘liq funksional uchuvchi apparat ishlab chiqishni istadik. Mazkur spider sport motosikliga o‘xshaydi, lekin osmonda ham harakatlana oladi”, deydi Patan.

Volonaut ushbu motosikllarning cheklangan sonini ishlab chiqarishni rejalashtirmoqda. Har bir transportning narxi 649 ming funt sterling (taxminan 870 ming dollar)dan boshlanishi kutilmoqda. Shu bilan birga, kompaniya ushbu motosiklning maksimal tezligi soatiga 101 kilometr bo‘lgan tijoriy versiyasini ham ishlab chiqarmoqda. Bu model yengil havo kemalari toifasiga kiradi va uni boshqarish uchun uchuvchilik guvohnomasi talab qilinmaydi. Faqat bir shart bor: uchar transportni aholi zich yashaydigan hududlardan uzoqroqda boshqarish kerak bo‘ladi.

Kompaniya hozirda apparatning dastlabki versiyasini takomillashtirish bilan band. Rasmiy ma’lumotlarga ko‘ra, 2026-yilda birinchi parvozning tasvirlari keng jamoatchilikka taqdim etiladi. 1-avgustdan esa ushbu texnologiyaning ilk xaridorlari uchun oldindan ro‘yxatdan o‘tish jarayoni boshlanadi. Volonaut vakillarining aytishicha, xaridorlar motosikl bilan birga professional instruktorlar ishtirokidagi maxsus o‘quv dasturida ham ishtirok etadi.