Pokiston politsiyasi moliyaviy firibgarlikda gumon qilib, Faysalobod shahridagi reydda 149 kishini hibsga oldi. Bu haqda mamlakat milliy kiberjinoyatlarni tergov qilish agentligiga tayanib BBC xabar berdi.
Agentlik Faysalobod shahrida faoliyat yuritayotgan noqonuniy markaz haqida ma’lumot olgan, so‘ngra hududda reyd o‘tkazgan. Markaz moliyalashtirish sxemalari bilan shug‘ullangani ma’lum bo‘lgan. U aldov yo‘li bilan odamlardan katta miqdorda pul olib, mablag‘lar soxta investitsiyalar nomiga o‘tkazilganini aytgan.
Qo‘lga olinganlar orasida 78 nafar pokistonlik, 48 nafar xitoylik, 8 nafar nigeriyalik, 4 nafar filippinlik, 2 nafar shri-lankalik, 6 nafar bangladeshlik, 2 nafar myanmalik va bir nafar zimbabvelik bor. Ularning 18 nafari ayol bo‘lgan.
Politsiya hisobotida aytilishicha, jabrlanuvchilar dastlab o‘zlarining birinchi sarmoyalaridan oz miqdorda daromad oladi, keyin esa kattaroq miqdorda pul yo‘qotadi.
“Ayblanuvchilar WhatsApp’da guruh ochgan. Ular oddiy odamlarni turli TikTok va YouTube kanallariga obuna qildirib, dastlab ozroq daromad bilan ta’minlagan. Keyinchalik ularga Telegram’da ko‘proq sarmoya talab qiladigan onlayn vazifalar berilgan. U yerda odamlar soxta investitsiyalar nomiga pul o‘tkazgan”, deyiladi bayonotda.
Qurbonlardan biri pokistonlik Muhammad Sajid BBC’ga intervyu bergan. Unda Sajid o‘n minglab a’zolari bo‘lgan Telegram kanaliga qo‘shilganini va kompaniya ishidan hayratda qolganini aytgan. Sajid firibgarlarga turli muddatlarda 3,138 million rupiydan ( 36,6 ming dollar ) ko‘proq pul bergan.
8-iyul kuni bo‘lib o‘tgan reyd davomida rasmiylar yuzlab kompyuter, server, kriptovalyuta birjalari va xorijiy SIM-kartalarni musodara qilgan. Ushbu reyd Faysalobod elektr tarmog‘ining sobiq rahbari Malik Tehsin Avanning qarorgohida bo‘lib o‘tgan, u hibsga olinmagan.
Izoh (0)