HAMAS o‘t ochishni to‘xtatishga tayyor ekanini bildirdi. Biroq bu G‘azo sektoridagi urushga to‘liq yakun yasashi kerakligini aytdi. Bu haqda The Guardian xabar berdi.
AQSH prezidenti Donald Tramp 1-iyul kuni Isroil 60 kunlik o‘t ochishni to‘xtatish taklifiga rozi bo‘lganini ma’lum qilgan va HAMASni ham bu shartlarga qo‘shilishga chaqirgandi. HAMAS bayonoti aynan shu chaqiriqqa javoban e’lon qilingan.
Falastin harakati vakili Tohir al-Nunu “kelishuvga erishish borasida tayyor va jiddiy” ekanliklarini ta’kidladi. Unga ko‘ra, HAMAS “urushning to‘liq tugashiga olib keladigan har qanday tashabbusni qabul qilishga tayyor”. Ularning delegatsiyasi 2-iyun kuni Qohirada misrlik va qatarlik vositachilar bilan uchrashib, taklifni muhokama qilishi kutilmoqda.
Otashkesim taklifi Trampning maxsus vakili Stiv Uitkoff boshchiligidagi bir necha oylik yashirin sa’y-harakatlardan so‘ng ishlab chiqilgan. Unda HAMASning ham manfaatlari hisobga olingani aytilmoqda. Jumladan, isroillik garovga olinganlar falastinlik mahbuslar evaziga ozod etiladi.
Ma’lumot uchun, Isroilning G‘azoga hujumida jami 56 ming 500 dan ortiq odam halok bo‘lgan, 134 mingga yaqini jarohatlangan.
Izoh (0)