Polsha Budapeshtdagi elchisini chaqirib olib, Vengriya bilan diplomatik munosabatlarni qisqartirmoqda. Bu haqda Anadolu xabar berdi.
Polsha nashrlarining xabar berishicha, mamlakat Tashqi ishlar vazirligi qarori bilan Budapeshtdagi elchi Sebastyan Kenchek 15-iyuldan o‘z vazifalarini bajarishni to‘xtatgan. Vazirlik matbuot kotibi Pavel Vronskiy elchining chaqirib olinishini quyidagicha izohladi:
“Yevropa Ittifoqining o‘zaro sodiqlik tamoyiliga zid ravishda Vengriya moliyaviy va jinoiy javobgarlikka tortilgan sobiq adliya vaziri o‘rinbosari Marsin Romanovskiyga siyosiy boshpana bergan”.
Vronski vaziyatga izoh berar ekan, keyingi qadamlar haqida prognoz berishdan bosh tortgan.
Vengriyaning javobi
Vengriya tashqi ishlar va savdo vaziri Peter Siyyarto Budapesht Polsha bilan mustahkam aloqalarga intilishini ta’kidlagan. Ammo Varshavadagi hukumat bundan manfaatdor emasligi aytilgan. Siyyartoga ko‘ra, Vengriya Polsha elchilariga har doim hurmat bilan munosabatda bo‘lgan.
“Ular urush tarafdori bo‘lgan hukumat, biz esa tinchlik tarafdorimiz. Biroq bu hamkorlik qilishga to‘sqinlik qilmasligi kerak”, degan vazir.
Polsha prokuraturasi 2019—2023-yillarda mamlakat adliya vaziri o‘rinbosari lavozimida ishlagan Marsin Romanovskiyga nisbatan bir qator ayblovlarni ilgari surgandi. Jumladan, u “uyushgan jinoiy guruh bilan til biriktirish” va “davlat mablag‘larini o‘zlashtirishga urinish”da ayblangan.
Romanovskiy bu ayblovlarni rad etib, 2024-yil dekabr oyida Vengriyadan siyosiy boshpana so‘rab murojaat qilgan. Vengriya hukumati esa uning iltimosini qondirgan. Oqibatda ushbu hodisa ikki davlat o‘rtasidagi munosabatlarda keskinlikni keltirib chiqargan.
Izoh (0)